وزیر اعلیٰ سندھ مراد علی شاہ نے حیدرآباد میں سڑک کے بیچوں بیچ بجلی کے کھمبے موجود رہنے کے معاملے پر انوکھی وضاحت پیش کرتے ہوئے اسے ایک مکمل منصوبہ بندی کا حصہ قرار دیا ہے۔ کراچی میں میڈیا سے گفتگو کرتے ہوئے انہوں نے بتایا کہ حیدرآباد میں سڑک کی تعمیر کے لیے چیف سیکرٹری نے کنٹونمنٹ بورڈ سے زمین کا حصول ممکن بنایا تھا۔
انہوں نے مزید کہا کہ سندھ حکومت کی جانب سے حیسکو کو فنڈز جمع کروائے جانے کے باوجود ادارے نے وقت پر کھمبے نہیں ہٹائے، جس پر یہ حکمت عملی بنائی گئی کہ پہلے سڑک تعمیر کر کے ٹریفک بحال کی جائے تاکہ حیسکو پر دباؤ پڑ سکے۔ ان کا کہنا تھا کہ سڑک پر ٹریفک کی آمدورفت شروع ہونے کے بعد شہریوں اور میڈیا نے اس پر آواز اٹھائی۔
مراد علی شاہ نے بتایا کہ اب میڈیا اور سوشل میڈیا کے شور مچانے کے بعد حیسکو نے کھمبے ہٹانا شروع کر دیے ہیں اور آج ایک سو میں سے پچیس کھمبے ہٹا دیے گئے ہیں۔ انہوں نے اس معاملے پر میڈیا اور سوشل میڈیا کا شکریہ ادا کرتے ہوئے مؤقف اپنایا کہ وفاقی ادارے صوبائی حکومت کی بات نہیں سنتے، اس لیے عوامی دباؤ کے ذریعے یہ کام کروایا گیا۔
سندھ کے وزیراعلیٰ نے یہ بھی واضح کیا کہ اس سڑک کا کام مکمل ہونے کے بعد حیدرآباد کے شہریوں کو آمدورفت میں بڑی آسانی فراہم ہوگی اور یہ سارا عمل ایک گرینڈ پلان کے تحت کیا گیا تھا۔
اپنی رائے دیں