پیرس اولمپک گیمز 2024 میں ویلٹر ویٹ کیٹیگری میں گولڈ میڈل جیتنے والی الجزائر کی باکسر ایمان خلیف نے پروفیشنل باکسنگ میں قدم رکھنے کا باضابطہ اعلان کر دیا ہے۔ یہ ان کی جانب سے اولمپک کامیابی کے بعد رنگ میں پہلی واپسی ہوگی۔
ایمان خلیف 15 دسمبر کو پیرس میں ہونے والے مقابلے میں سپر ویلٹر ویٹ کلاس میں کلریڈا سارابیا کے خلاف رنگ میں اتریں گی۔ اس مقابلے کے لیے وہ کافی عرصے سے تیاریوں میں مصروف تھیں۔
جمعہ کے روز ایک پریس کانفرنس کے دوران ایمان خلیف نے اپنے کوچ کا مل عبدالسلام اور پروموٹر یاسین براباہ کے ہمراہ گفتگو کرتے ہوئے کہا کہ وہ گزشتہ دو سال سے باکسنگ رنگ سے دور تھیں اور اب دوبارہ واپسی کے لیے بے حد پرجوش ہیں۔
ایمان خلیف نے اپنے جذبات کا اظہار کرتے ہوئے کہا کہ گزشتہ دو برس ان کے لیے کافی مشکل رہے ہیں، تاہم اب وقت آ گیا ہے کہ وہ پروفیشنل باکسنگ میں اپنی صلاحیتوں کا لوہا منوائیں اور وہ اس کے لیے اپنی پوری کوشش کریں گی۔
ان کے کوچ کا مل عبدالسلام نے اس موقع پر مکمل اعتماد کا اظہار کرتے ہوئے کہا کہ وہ اپنی باکسر کو تین سے پانچ مقابلوں کے اندر عالمی چیمپئن بنتے ہوئے دیکھ رہے ہیں۔
کوچ نے ایمان خلیف کی باکسنگ تکنیک کا موازنہ لیجنڈری باکسر محمد علی سے کرتے ہوئے کہا کہ ان کا حتمی ہدف ایمان کو دنیا کی بہترین باکسر بنانا ہے۔
واضح رہے کہ 27 سالہ ایمان خلیف کے پاس فرانسیسی باکسنگ فیڈریشن کا پروفیشنل لائسنس موجود ہے۔ وہ اس سے قبل اپریل میں اپنی واپسی کرنا چاہتی تھیں تاہم تربیتی سیشن کے دوران انجری کے باعث ان کا یہ منصوبہ تاخیر کا شکار ہو گیا تھا۔
ایمان خلیف پیرس اولمپکس کے دوران صنفی تنازع کی زد میں رہی تھیں۔ ان کے بارے میں اکثر یہ دعویٰ کیا جاتا رہا ہے کہ وہ ٹرانس جینڈر ایتھلیٹ ہیں، تاہم حقائق کے مطابق ایمان خلیف پیدائشی طور پر خاتون ہیں اور ان کے جسم میں قدرتی طور پر وائی کروموسوم پر موجود ایس آر وائی جین پایا جاتا ہے جو مردانگی کی نشاندہی کرتا ہے۔
فرانسیسی اسپورٹس اخبار 'لی کپ' کو دیے گئے ایک انٹرویو میں ایمان خلیف نے رواں سال فروری میں انکشاف کیا تھا کہ پیرس اولمپکس سے قبل انہوں نے اپنے ٹیسٹوسٹیرون لیول کو کم کرنے کے لیے طبی علاج بھی کروایا تھا۔
پیرس اولمپک گیمز میں ان کی شرکت اور کامیابی نے عالمی کھیلوں کے حلقوں میں کافی بحث کو جنم دیا تھا۔ اس کے باوجود، انہوں نے اپنی توجہ کھیل پر مرکوز رکھی اور اب وہ پروفیشنل کیریئر کے ایک نئے باب کا آغاز کرنے جا رہی ہیں۔
کھیلوں کے مبصرین کی نظریں اب 15 دسمبر کو ہونے والے اس مقابلے پر مرکوز ہیں، جہاں یہ دیکھنا دلچسپ ہوگا کہ ایمان خلیف پروفیشنل باکسنگ کے ماحول میں کس طرح کی کارکردگی کا مظاہرہ کرتی ہیں۔
اپنی رائے دیں