فرانس کے مشرقی علاقے میں پیش آنے والے ایک افسوسناک بس حادثے کے نتیجے میں ایک بچے سمیت دو افراد ہلاک اور متعدد زخمی ہو گئے ہیں۔ یہ حادثہ جمعہ کی صبح اس وقت پیش آیا جب مسافروں سے بھری بس سڑک سے اتر کر کھائی میں جا گری۔
مقامی حکام کے مطابق حادثہ لینٹ (Lent) نامی قصبے کے قریب پیش آیا، جہاں بس لیون اور بورگ-این-بریس کے درمیان سفر کر رہی تھی۔ ابتدائی اطلاعات کے مطابق بس میں 43 مسافر سوار تھے جن میں 15 بچے بھی شامل تھے۔
بورگ-این-بریس کے پراسیکیوٹر آفس نے تصدیق کی ہے کہ ہلاک ہونے والوں میں ایک نابالغ اور ایک نوجوان شامل ہے۔ حادثے کے بعد تین افراد کی حالت تشویشناک بتائی جا رہی ہے جنہیں طبی امداد کے لیے فوری طور پر ہسپتال منتقل کیا گیا ہے۔
مقامی میئر یویس کرسٹن نے میڈیا کو بتایا کہ بس سڑک سے اتر کر ایک درخت سے ٹکرا کر کھائی میں جا گری۔ انہوں نے بتایا کہ حادثے کے وقت دھند تھی اور سڑک گی لی تھی تاہم حادثے کی حتمی وجوہات جاننے کے لیے تحقیقات شروع کر دی گئی ہیں۔
فرانس کے وزیرِ ٹرانسپورٹ فلپ ٹباروٹ نے سوشل میڈیا پر اپنے پیغام میں کہا کہ وہ جائے وقوعہ پر پہنچ رہے ہیں۔ انہوں نے بتایا کہ امدادی کارروائیوں کے لیے 100 سے زائد فائر فائٹرز اور طبی ہیلی کاپٹرز کو بھی طلب کیا گیا ہے۔
فرانس کے وزیرِ تعلیم ایڈورڈ جیفرے نے واقعے پر افسوس کا اظہار کرتے ہوئے کہا کہ یہ ایک المناک سانحہ ہے جس میں طلباء بھی متاثر ہوئے ہیں۔ مقامی انتظامیہ نے متاثرین کی مدد اور امدادی ٹیموں کے ساتھ رابطے کے لیے قریبی ٹاؤن ہال میں مرکز قائم کر دیا ہے۔
حادثے میں 13 افراد کو معمولی چوٹیں آئی ہیں جنہیں ابتدائی طبی امداد فراہم کی جا رہی ہے۔ بس ڈرائیور بھی زخمی ہوا ہے جسے ہسپتال منتقل کیا گیا ہے اور پولیس کی جانب سے اس کا بیان ریکارڈ کرنا ابھی باقی ہے۔
عینی شاہدین اور مقامی حکام کے مطابق حادثے کے بعد بس کا ایک حصہ بری طرح تباہ ہو گیا تھا۔ حکام کا کہنا ہے کہ اس مرحلے پر حادثے کی کوئی واضح وجہ بیان کرنا قبل از وقت ہوگا، تاہم تحقیقات جاری ہیں۔
اپنی رائے دیں