جدید دور میں سوشل میڈیا کے بڑھتے ہوئے استعمال نے آمدنی کے نئے اور انوکھے ذرائع کو جنم دیا ہے، جن میں طویل ویڈیوز سے مختصر کلپس تیار کرکے انہیں مختلف پلیٹ فارمز پر وائرل کرنا بھی شامل ہے۔ اس پیشے سے وابستہ افراد کو کلپرز کہا جاتا ہے جو مختلف برانڈز، پوڈکاسٹرز اور انفلوئنسرز کے لیے کام کرتے ہیں۔
لندن سے تعلق رکھنے والے بائیس سالہ نوجوان ایکنور سنگھ اس پیشے سے وابستہ نمایاں افراد میں شامل ہیں، جو طویل ویڈیوز کا باریک بینی سے جائزہ لیتے ہیں اور ان کے انتہائی دلکش حصوں کو تراش کر مختصر ورٹیکل ویڈیوز کی شکل میں جاری کرتے ہیں۔
ایکناز سنگھ کے مطابق وہ اس کام کے ذریعے ماہانہ دس ہزار پاؤنڈ تک کما رہے ہیں، اور جتنا زیادہ کسی کلپ کو ویوز ملتے ہیں ان کی آمدنی میں اتنا ہی اضافہ ہوتا چلا جاتا ہے۔
اس عمل کا آغاز اس وقت ہوتا ہے جب کوئی کلائنٹ، خواہ وہ کپڑوں کا برانڈ ہو یا فلم اسٹوڈیو، ایک طویل ویڈیو کلپر کے حوالے کرتا ہے جسے وہ دیکھ کر اہم اور دلچسپ حصے الگ کرتا ہے۔
مختصر ویڈیو کلپس عام طور پر تیس سے ساٹھ سیکنڈ پر مشتمل ہوتے ہیں جو انسٹاگرام، یوٹیوب اور ٹک ٹاک جیسے مقبول پلیٹ فارمز پر اپ لوڈ کیے جاتے ہیں تاکہ زیادہ سے زیادہ ناظرین کو متوجہ کیا جا سکے۔
نوجوان کلپرز اس بات کو بخوبی سمجھتے ہیں کہ موجودہ دور میں اسکرین کے سامنے بیٹھے ناظرین کی ترجیحات کیا ہیں اور وہ کس قسم کے مواد میں فوری دلچسپی ظاہر کرتے ہیں۔
مختلف پلیٹ فارمز پر ویوز کی تعداد کی بنیاد پر معاوضہ طے ہوتا ہے جہاں بعض اوقات فی ایک ہزار ویوز کے عوض مخصوص ڈالر ادا کیے جاتے ہیں جو کہ ایک منافع بخش کاروبار بن چکا ہے۔
ایکنور سنگھ نے اس شعبے کی طرف قدم اس وقت بڑھایا جب انہوں نے پاپ گلوکارہ دعا لیپا کی ایک مختصر ویڈیو اپ لوڈ کر کے محض ایک پوسٹ سے معقول رقم حاصل کی تھی۔
امریکی ریاست کینساس سے تعلق رکھنے والے چوبیس سالہ ایتھن ویمز بھی اس شعبے سے وابستہ ہیں جو یوٹیوبر اور پوڈکاسٹر کیلیب ہیمر کے پروگرام کے لیے مختصر ویڈیوز تیار کرتے ہیں۔
ایتھن ویمز کا کہنا ہے کہ یہ ذریعہ معاش انہیں گھر بیٹھے کام کرنے کی سہولت فراہم کرتا ہے جس سے انہیں اپنی فیملی بالخصوص اپنے چھوٹے بیٹے کے ساتھ وقت گزارنے کا موقع ملتا ہے۔
روایتی نو سے پانچ بجے تک کی دفتر کی ملازمتوں سے ہٹ کر یہ ڈیجیٹل روزگار نوجوان نسل کے لیے انتہائی پرکشش اور لچکدار ذریعہ آمدنی کی صورت میں سامنے آ رہا ہے۔
تاہم سوشل میڈیا کے ماہرین خبردار کرتے ہیں کہ اس میدان میں کامیابی ہر کسی کا مقدر نہیں بنتی اور اس کے پیچھے گھنٹوں طویل مواد کو دیکھنے اور پرکھنے کی سخت محنت کارفرما ہوتی ہے۔
مختصر ویڈیوز کی ترویج کے لیے اب باقاعدہ ڈیجیٹل پلیٹ فارمز اور ویب سائٹس بھی قائم ہو چکی ہیں جو برانڈز اور کلپرز کو آپس میں جوڑنے کا فریضہ سر انجام دے رہی ہیں۔
ان ویب سائٹس میں کلپنگ کلچر، وائرو، وھوپ اور کِک جیسے نام سرفہرست ہیں جو دنیا بھر کے ہزاروں نوجوانوں کو نامور کمپنیوں کے ساتھ کام کرنے کے مواقع فراہم کر رہے ہیں۔
بڑی کمپنیاں روایتی اشتہارات چلانے کے مقابلے میں ان نوجوان کلپرز کی خدمات حاصل کرنے کو زیادہ ترجیح دیتی ہیں کیونکہ یہ طریقہ سستا اور زیادہ مؤثر ثابت ہوتا ہے۔
اپنی رائے دیں