سوئی ناردرن گیس کمپنی نے نئے گھریلو کنکشنز پر پابندی غیر معینہ مدت تک کے لیے بڑھا دی ہے جس کے باعث ارجنٹ فیسیں جمع کرانے والے ہزاروں شہری کنکشنز سے محروم ہیں۔ کمپنی نے کمرشل تندوروں اور ہوٹلوں سمیت دیگر تمام نئے کنکشنز بھی بند کرنے کا فیصلہ کیا ہے۔
لاہور سے موصولہ اطلاعات کے مطابق نئے کنکشنز کی فراہمی میں تعطل کی بنیادی وجہ آر ایل این جی سپلائی میں خلل اور بڑھتا ہوا شارٹ فال ہے۔ ایران اور امریکا کے درمیان جاری جنگ کے اثرات کے باعث ایل پی جی کا بحران بھی شدید صورت اختیار کر گیا ہے۔
ذرائع کا کہنا ہے کہ موسم سرما کی آمد کے ساتھ ہی گیس کی ملکی طلب میں کئی گنا اضافہ ہو چکا ہے جس سے موجودہ صارفین کو بھی گیس کی باقاعدہ فراہمی متاثر ہو رہی ہے۔ آنے والے دنوں میں گیس کی قلت کا یہ بحران مزید سنگین ہونے کے خدشات ظاہر کیے جا رہے ہیں۔
سوئی گیس حکام کے مطابق نئے کنکشنز پر پابندی عائد کرنے کا فیصلہ وزارت پٹرولیم کی جانب سے کیا گیا ہے۔ حکام کا مزید کہنا ہے کہ ایران اور امریکا کے درمیان کشیدگی ختم ہونے کے بعد ہی گیس کے نئے کنکشنز کی بحالی ممکن ہو سکے گی۔
اپنی رائے دیں