دنیا کے جدید ترین سپر کمپیوٹرز اور مصنوعی ذہانت (اے آئی) کے ڈیٹا سینٹرز کے لیے چپس بنانے والی معروف ٹیکنالوجی کمپنی ’این ویڈیا‘ (Nvidia) نے اپنی فنانس چیف کولیٹ کریس کو کمپنی کی عبوری چیف ایگزیکٹو آفیسر (سی ای او) مقرر کر دیا ہے۔
کمپنی کی جانب سے جمعرات کو کیے گئے اس اعلان کے بعد کولیٹ کریس اب باضابطہ طور پر جینسن ہوانگ کی جگہ ذمہ داریاں سنبھالیں گی۔ یہ تقرری اس وقت عمل میں آئی ہے جب کمپنی کے بورڈ نے شریک بانی اور سی ای او جینسن ہوانگ کو دو غیر ازدواجی تعلقات کی رپورٹس منظرِ عام پر آنے کے بعد عہدے سے ہٹا دیا، جن میں سے ایک خاتون پر مبینہ طور پر چینی جاسوس ہونے کا الزام ہے۔
این ویڈیا کی نئی سربراہ کولیٹ کریس کے بارے میں پانچ اہم حقائق درج ذیل ہیں:
2013 سے بطور سی ایف او خدمات کولیٹ کریس نے ستمبر 2013 میں بطور ایگزیکٹو نائب صدر اور چیف فنانشل آفیسر (سی ایف او) این ویڈیا میں شمولیت اختیار کی تھی اور تب سے وہ اسی عہدے پر فائز ہیں۔ وہ کمپنی کی سہ ماہی مالیاتی رپورٹس کے موقع پر جینسن ہوانگ کے ہمراہ نظر آتی رہی ہیں۔ جس مالی سال میں انہوں نے کمپنی جوائن کی، اس وقت این ویڈیا کی آمدنی 4.13 ارب ڈالر تھی، جو مالی سال 2026 میں بڑھ کر 215.9 ارب ڈالر تک پہنچ چکی ہے۔
این ویڈیا سے قبل کیریئر این ویڈیا میں آنے سے قبل، کریس نے ٹیکساس انسٹرومنٹس (Texas Instruments) میں فنانس کے شعبے میں آٹھ سال گزارے اور پھر 1997 سے 2010 تک مائیکروسافٹ سے وابستہ رہیں۔ مائیکروسافٹ میں وہ 2006 میں سرور اینڈ ٹولز ڈویژن کی سی ایف او بنیں، جہاں مالیاتی حکمت عملی، منصوبہ بندی اور رپورٹنگ ان کی ذمہ داری تھی۔ بعد ازاں 2010 میں وہ بطور سینئر نائب صدر اور سی ایف او ’سسکو‘ (Cisco) چلی گئیں اور 2013 میں این ویڈیا کا حصہ بنیں۔
تعلیم اور پیشہ ورانہ تجربہ امریکی سیکیورٹیز اینڈ ایکسچینج کمیشن میں جمع کرائی گئی این ویڈیا کی سالانہ رپورٹ کے مطابق، کولیٹ کریس نے یونیورسٹی آف ایریزونا سے فنانس میں بیچلر آف سائنس اور سدرن میتھوڈسٹ یونیورسٹی سے ایم بی اے کی ڈگری حاصل کر رکھی ہے۔ جریدہ ’فارچون‘ کی 2024 کی رپورٹ کے مطابق، بڑی ٹیکنالوجی کمپنیوں میں تقریباً 25 سال تک مالیاتی عہدوں پر کام کرنے کے بعد جب وہ 2013 میں این ویڈیا میں آئیں، تو ان کے بقول یہ ان کے کیریئر کی سب سے چھوٹی کمپنی تھی۔
ملازمت کی شرائط کمپنی کے بیان کے مطابق، این ویڈیا میں ایگزیکٹو افسران کی ملازمت کسی انفرادی معاہدے یا علیحدگی کے خصوصی پیکج کی پابند نہیں ہوتی، حالانکہ دیگر ہم پلہ کمپنیاں اس طرح کے معاہدے پیش کرتی ہیں۔ ریگولیٹری دستاویزات سے معلوم ہوتا ہے کہ کریس کے معاوضے میں کمپنی کے مخصوص شیئرز (اسٹاک یونٹس) شامل ہیں، جن میں مارچ 2026 کا ایوارڈ بھی شامل ہے جو چار سالوں میں مکمل ہو گا۔
مجموعی دولت معروف جریدے ’فوربز‘ (Forbes) نے 2026 میں امریکہ کی اپنی مدد آپ کے تحت امیر بننے والی (سیلف میڈ) خواتین کی فہرست میں کولیٹ کریس کو 32 ویں نمبر پر رکھا ہے۔ بدھ کے روز مارکیٹ بند ہونے تک چپ ساز کمپنی میں ان کے شیئرز کی مالیت تقریباً 75 کروڑ (750 ملین) ڈالر تھی، جو کہ گزشتہ ماہ حصص کی بلند ترین سطح کے وقت ایک ارب ڈالر سے تجاوز کر گئی تھی۔
اپنی رائے دیں