گلگت بلتستان میں یوم آزادی روایتی جوش و جذبے سے منایا جا رہا ہے

گلگت بلتستان میں یکم نومبر کو یومِ آزادی بھرپور قومی جوش و جذبے کے ساتھ منایا جا رہا ہے، جس کا مقصد خطے کے عوام کی تاریخی جدوجہد کی یاد تازہ کرنا اور پاکستان سے اپنی وابستگی کا اظہار کرنا ہے۔

یکم نومبر 1947 کو گلگت اسکاؤٹس اور مقامی جانبازوں نے جنگِ آزادی میں کامیابی حاصل کرتے ہوئے ڈوگرا راج کا خاتمہ کیا اور علاقے میں پاکستانی پرچم لہرایا تھا۔

آئی ایس پی آر کے مطابق اس دن کی مناسبت سے ایک خصوصی ملی نغمہ بعنوان ’’شانِ پاکستان، گلگت بلتستان‘‘ جاری کیا گیا ہے۔

تاریخی ریکارڈ کے مطابق اس جدوجہد کے ایک سال بعد 14 اگست 1948 کو بلتستان کے دیگر حصوں کو بھی تسلط سے آزاد کرا لیا گیا تھا جس کے بعد یہاں کے غیور عوام نے بعد کی پاک بھارت جنگوں میں بھی ناقابل فراموش کارنامے سرانجام دیے۔