وفاقی وزیر صحت مصطفیٰ کمال نے واضح کیا ہے کہ ویکسین کی خریداری کے معاملے پر دس ارب روپے کی کرپشن کے الزامات سراسر بے بنیاد ہیں اور اس سلسلے میں سرکاری خزانے سے ایک روپیہ بھی خرچ نہیں کیا گیا۔ انہوں نے یہ بات اسلام آباد میں ایک اہم پریس کانفرنس سے خطاب کرتے ہوئے کہی جہاں انہوں نے ویکسین کی خریداری سے جڑے تمام امور پر تفصیلی روشنی ڈالی۔
ان کا کہنا تھا کہ گزشتہ ایک ہفتے سے وزارتِ صحت کے حوالے سے سوشل میڈیا پر مختلف خبریں گردش کر رہی تھیں، اس لیے ضروری تھا کہ حقائق قوم کے سامنے رکھے جائیں۔ انہوں نے بتایا کہ اس معاملے میں ویکسین فراہم کرنے والی کمپنی کو بھی تاحال کوئی ادائیگی نہیں کی گئی ہے۔
وفاقی وزیر نے وضاحت کی کہ اٹھارہ کروڑ تیس لاکھ پچپن ہزار روپے نادرا کے اکاؤنٹ میں جمع ہیں اور قومی خزانے کو کوئی مالی نقصان نہیں پہنچا۔ ان کے مطابق اس پورے معاملے میں مالی نقصان ویکسین فراہم کرنے والے فریق کو اٹھانا پڑا ہے۔
معاملے کی تفصیلات بتاتے ہوئے انہوں نے کہا کہ بارڈر ہیلتھ سروسز کی جانب سے عمرہ زائرین کو بیرونِ ملک روانگی سے قبل ویکسین کی فراہمی کے لیے مراسلہ جاری کیا گیا تھا۔ وزیراعظم آفس کے مراسلے کی روشنی میں وزارتِ صحت کو بھی اس پیشرفت سے آگاہ کیا گیا تھا جس پر وزارت نے نو مئی کو پرکیورمنٹ کمیٹی تشکیل دی تھی۔
وزارتِ صحت نے شکایات کے ازالے کے لیے ڈائریکٹر جنرل ہیلتھ کی زیر صدارت گریوینس کمیٹی بھی قائم کی تھی تاکہ کسی بھی قسم کے اعتراض کی صورت میں متعلقہ افراد فوری طور پر رجوع کر سکیں۔ تاہم مصطفیٰ کمال کے مطابق تقریباً ایک ماہ بعد متعلقہ حکام نے اپنے طور پر الگ کمیٹیاں تشکیل دے دیں۔
ڈی جی ہیلتھ کی جانب سے بھی اعتراضات کے جائزے کے لیے ایک اور الگ کمیٹی قائم کی گئی جس کے باعث قانونی تقاضوں کی خلاف ورزی ہوئی اور یہ معاملہ عدالت تک جا پہنچا۔ عدالتی کارروائی مکمل ہونے کے بعد وزیراعظم نے اس پورے معاملے کی جانچ کے لیے ایک اعلیٰ سطحی انکوائری کمیٹی تشکیل دی۔
انکوائری کے نتیجے میں یہ بات سامنے آئی کہ بارڈر ہیلتھ سروسز کے حکام نے وزارتِ صحت کو بائی پاس کیا اور پبلک پروکیورمنٹ ریگولیٹری اتھارٹی یعنی پیپرا کے قواعد و ضوابط کی خلاف ورزی کی۔ اس عمل میں پبلک پرائیویٹ پارٹنرشپ کے تحت نادرا کو بھی شامل کیا گیا جبکہ وزارت کی اپنی تشکیل کردہ پرکیورمنٹ کمیٹی کو یکسر نظر انداز کر دیا گیا۔
وفاقی وزیر صحت نے بتایا کہ انکوائری رپورٹ بہت جلد وزارتِ صحت کی ویب سائٹ پر عوام کی آگاہی کے لیے اپ لوڈ کر دی جائے گی۔ انکوائری کمیٹی نے اپنی رپورٹ میں بارڈر ہیلتھ سروسز کے افسران کو اس بات کا ذمہ دار ٹھہرایا ہے کہ انہوں نے وزیر اور وزارت کو اعتماد میں لیے بغیر اقدامات کیے۔
رپورٹ میں اس پرکیورمنٹ کمیٹی کو بھی ذمہ دار قرار دیا گیا جبکہ بعد میں تعینات ہونے والے ڈائریکٹر نے بھی ان غیر قانونی اقدامات کی توثیق کی تھی۔ مصطفیٰ کمال نے تصدیق کی کہ انکوائری کمیٹی کی تمام سفارشات پر سو فیصد عملدرآمد کیا جا چکا ہے اور مستقبل کے لیے ایک نئی پرکیورمنٹ کمیٹی بنائی جا رہی ہے۔
انہوں نے مزید بتایا کہ وزیراعظم آفس کی ہدایات پر وفاقی تحقیقاتی ادارے یعنی ایف آئی اے کو کارروائی کے احکامات جاری کیے گئے تھے۔ ان احکامات کے نتیجے میں متعلقہ افراد کو حراست میں لے کر جیل منتقل کر دیا گیا ہے تاکہ قانون کے مطابق کارروائی کو آگے بڑھایا جا سکے۔
اپنی رائے دیں