نائب وزیراعظم اور وزیر خارجہ سینیٹر محمد اسحاق ڈار نے کہا ہے کہ پاکستان اپنی خودمختاری اور قومی مفادات کا تحفظ یقینی بناتے ہوئے علاقائی امن اور معاشی خوشحالی کیلئے کوششیں جاری رکھے گا۔ انہوں نے ان خیالات کا اظہار منگل کو اسلام آباد میں 'مارگلہ ڈائیلاگ 2026' کے افتتاحی سیشن سے خطاب کرتے ہوئے کیا جس کا اہتمام اسلام آباد پالیسی ریسرچ انسٹی ٹیوٹ نے کیا تھا۔
اسحاق ڈار نے عالمی سطح پر بڑھتی ہوئی کشیدگی اور بڑی طاقتوں کے درمیان مسابقت پر تشویش کا اظہار کرتے ہوئے کہا کہ پاکستان تنازعات کے پرامن حل اور کثیرالجہتی تعاون پر یقین رکھتا ہے۔ انہوں نے واضح کیا کہ پاکستان امن کا خواہاں ہے تاہم اپنی خودمختاری کے دفاع کیلئے پوری قوت سے اقدامات کرے گا۔
کشمیر کے دیرینہ تنازعہ پر بات کرتے ہوئے نائب وزیراعظم نے کہا کہ خطے میں پائیدار امن کیلئے اقوام متحدہ کی سلامتی کونسل کی متعلقہ قراردادوں کے مطابق مسئلہ کشمیر کا منصفانہ حل ناگزیر ہے۔ انہوں نے پانی کو بطور ہتھیار استعمال کرنے کی کوششوں کے خلاف خبردار کرتے ہوئے سندھ طاس معاہدے کے تحت پاکستان کے حقوق کے تحفظ کے عزم کا اعادہ کیا۔
افغانستان کی صورتحال پر گفتگو کرتے ہوئے انہوں نے کہا کہ افغان سرزمین کا استعمال کسی دوسرے ملک بالخصوص پاکستان کے خلاف دہشت گردانہ سرگرمیوں کیلئے نہیں ہونا چاہیے۔ انہوں نے کہا کہ پاکستان ایک پرامن، مستحکم اور معاشی طور پر مربوط افغانستان کی حمایت کرتا ہے اور اپنے عوام کے تحفظ کیلئے اقدامات جاری رکھے گا۔
نائب وزیراعظم نے مشرق وسطیٰ میں امن کیلئے پاکستان کے کردار کو اجاگر کرتے ہوئے کہا کہ پاکستان نے امریکہ اور ایران کے درمیان اسلام آباد مذاکرات میں سہولت کاری فراہم کی ہے۔ انہوں نے چین کے ساتھ قریبی رابطہ کاری اور خلیجی ممالک کے ساتھ مل کر امن و استحکام کیلئے کی جانے والی کوششوں کا بھی ذکر کیا۔
انہوں نے سعودی عرب اور ترکیہ کے ساتھ مکہ مشترکہ دفاعی معاہدے کا حوالہ دیتے ہوئے اسے اجتماعی سلامتی اور قابل اعتماد دفاعی صلاحیت کو مضبوط بنانے کا ذریعہ قرار دیا۔ اسحاق ڈار نے کہا کہ یہ دفاعی انتظام کسی مخصوص ملک کو ہدف بنانے کیلئے نہیں ہے۔
معاشی محاذ پر بات کرتے ہوئے انہوں نے کہا کہ پاکستان کی خارجہ پالیسی میں معاشی سفارت کاری کو مرکزی حیثیت حاصل ہے۔ انہوں نے زور دیا کہ برآمدات کی منڈیوں کو وسعت دینے، پیداواری سرمایہ کاری کو راغب کرنے اور ٹیکنالوجی کے شعبے میں تعاون سے ہی عوام کے معیار زندگی کو بہتر بنایا جا سکتا ہے۔
اسحاق ڈار نے عالمی برادری پر زور دیا کہ وہ گلوبل ساؤتھ کی ترقیاتی ضروریات کو پورا کرنے کیلئے مالی وسائل اور جدید ٹیکنالوجی تک منصفانہ رسائی کو یقینی بنائے۔ انہوں نے کہا کہ عالمی غیر یقینی صورتحال سے نمٹنے کیلئے پاکستان اپنی معیشت، اداروں اور تکنیکی صلاحیتوں کو مضبوط بنا رہا ہے۔
تقریب کے دوران انہوں نے مئی 2025 میں بھارت کی جارحیت کے جواب میں 'آپریشن بنی ان مرصوص' کا ذکر کرتے ہوئے مسلح افواج کی پیشہ ورانہ مہارت کو خراج تحسین پیش کیا۔ انہوں نے کہا کہ یہ آپریشن پاکستان کی قومی خودمختاری کے دفاع کے عزم اور صلاحیت کا مظہر تھا۔
مارگلہ ڈائیلاگ 2026 میں اسلام آباد پالیسی ریسرچ انسٹی ٹیوٹ کے صدر لیفٹیننٹ جنرل (ر) ماجد احسان، غیر ملکی سفیروں اور دیگر اہم شخصیات نے شرکت کی۔
اپنی رائے دیں