معروف آنجہانی پنجابی گلوکار سدھو موسے والا کے دو سالہ چھوٹے بھائی شبھ دیپ سنگھ سدھو کی ایک ویڈیو سوشل میڈیا پر تیزی سے مقبول ہو رہی ہے، جس میں وہ اپنے بڑے بھائی کے مخصوص اور مشہور انداز کی نقل کرتے ہوئے دکھائی دے رہے ہیں۔
یہ دلچسپ منظر کینیڈا کے شہر ٹورنٹو کے اسکوٹیا بینک ایرینا میں منعقدہ ایک خصوصی تقریب کے دوران سامنے آیا، جہاں مداحوں کی بڑی تعداد موجود تھی اور ہر آنکھ اشکبار تھی۔
یہ تقریب سدھو موسے والا کے ہولوگرام ورلڈ ٹور کے سلسلے میں منعقد کی گئی تھی، جس کا آغاز ’سائنڈ ٹو گاڈ‘ کے عنوان سے کیا گیا تھا اور اس میں مداحوں کی بڑی تعداد نے شرکت کی۔
تقریب کے دوران چھوٹے شبھ دیپ سنگھ سدھو نے اسٹیج پر اپنے بڑے بھائی کا روایتی اور مشہور انداز اپناتے ہوئے اپنی ران پر ہاتھ مار کر ’تھاپی‘ لگائی، جسے حاضرین نے بے حد پسند کیا۔
اس جذباتی موقع پر گلوکار کے والد بلکور سنگھ اور والدہ چرن کور بھی اسٹیج پر موجود تھے، جنہوں نے اس تقریب میں شرکت کی اور اپنے چھوٹے بیٹے کے اس انداز کو دیکھ کر جذباتی ہوگئے۔
تقریب کے دوران ہولوگرام ٹیکنالوجی، تھری ڈی عکس بندی، خصوصی بصری اثرات اور گلوکار کی اصل آواز کا استعمال کرتے ہوئے ایسا ماحول پیدا کیا گیا جیسے سدھو موسے والا خود اسٹیج پر موجود ہوں۔
ٹورنٹو کے اس بڑے ایرینا میں موجود شائقین موسیقی نے اس جدید ٹیکنالوجی کے ذریعے اپنے ہر دلعزیز فنکار کو اسٹیج پر موجود محسوس کیا، جس سے پورا ماحول انتہائی جذباتی اور یادگار بن گیا۔
تقریب کے دوران سدھو موسے والا کے انتہائی مقبول گانے ’295‘ کی نئی میوزک ویڈیو بھی جاری کی گئی، جس میں گلوکار کی اپنے اہل خانہ کے ساتھ گزرے پرانی لمحات اور ویڈیوز کو شامل کیا گیا تھا۔
آنجہانی گلوکار سدھو موسے والا کا اصل نام بھی شبھ دیپ سنگھ سدھو تھا، جو انتیس مئی دو ہزار بائیس کو بھارتی ریاست پنجاب کے ضلع مانسا کے گاؤں جواہرکے میں پیش آنے والے ایک فائرنگ کے افسوسناک واقعے میں ہلاک ہو گئے تھے۔
ان کی اس اچانک موت نے دنیا بھر میں ان کے چاہنے والوں کو شدید صدمے سے دوچار کیا تھا اور ان کے مداح آج بھی ان کے چاہنے اور یاد کرنے کا کوئی موقع ہاتھ سے نہیں جانے دیتے ہیں۔
سدھو موسے والا گیارہ جون سنہ انیس سو ترانوے میں ضلع مانسا کے گاؤں موسا میں پیدا ہوئے اور انہوں نے پنجابی موسیقی کی دنیا میں اپنے منفرد انداز اور گائکی کی بدولت عالمی سطح پر بے پناہ شہرت حاصل کی۔
گلوکار کی المناک موت کے طویل عرصے بعد سترہ مارچ دو ہزار چوبیس کو ان کے والدین کے ہاں ایک اور بیٹے کی پیدائش ہوئی، جن کا نام بھی اپنے آنجہانی بڑے بھائی کی نسبت سے شبھ دیپ سنگھ سدھو رکھا گیا۔
اپنی رائے دیں