نوشہرہ کے علاقے پناکوٹ چراٹ میں نامعلوم مسلح افراد کی فائرنگ سے اسسٹنٹ کمشنر مانسہرہ عادل وسیم شدید زخمی ہوگئے۔ پولیس کے مطابق فائرنگ کا یہ واقعہ چراٹ روڈ جلوزئی پناہ کوٹ کے قریب اس وقت پیش آیا جب اسسٹنٹ کمشنر مانسہرہ فاتحہ خوانی کے لیے اپنے آبائی گاؤں جا رہے تھے۔
پولیس کا کہنا ہے کہ نامعلوم ملزمان نے ایک سرکاری گاڑی کو نشانہ بنایا جس کے نتیجے میں عادل وسیم زخمی ہوئے جنہیں فوری طور پر طبی امداد کے لیے اسپتال منتقل کردیا گیا۔ ایس ایچ او علاقہ بھاری نفری کے ساتھ موقع پر پہنچ گئے اور ملزمان کی گرفتاری کے لیے سرچ آپریشن شروع کردیا گیا ہے۔
مشیر گورنر خیبرپختونخوا برائے اطلاعات و تعلقات عامہ ثمر ہارون بلور نے اس واقعے پر شدید تشویش کا اظہار کرتے ہوئے زخمی افسر کے لیے جلد صحت یابی کی دعا کی ہے۔ انہوں نے واقعے کی شفاف تحقیقات اور ملوث عناصر کو فوری گرفتار کرکے قانون کے کٹہرے میں لانے کا مطالبہ کیا ہے۔
اپنی رائے دیں