امریکہ کی ریاست ٹیکساس کے شہر ہیوسٹن کے مئیر نے پولیس کو وفاقی امیگریشن اینڈ کسٹمز انفورسمنٹ یعنی آئی سی ای سے رابطہ اور تعاون محدود کرنے کی ہدایت جاری کر دی ہے۔ مئیر جان وائٹ مائر کی جانب سے یہ قدم شہر کی سابقہ پالیسی میں ایک نمایاں تبدیلی کی حیثیت رکھتا ہے۔ نئی ہدایات کے تحت ہیوسٹن پولیس اب اس وقت تک آئی سی ای سے رابطہ نہیں کرے گی جب تک کسی ایسے شخص کو حراست میں نہ لیا جائے جس کے خلاف قابلِ گرفت جرم کا مقدمہ ہو اور ساتھ ہی اس پر کوئی انتظامی امیگریشن وارنٹ بھی موجود ہو۔
ہیوسٹن کے پولیس چیف نوئے ڈی از نے جمعہ کے روز وضاحت کرتے ہوئے بتایا کہ اگر پولیس کسی کو معمولی ٹریفک قوانین کی خلاف ورزی پر روکے گی اور اسے صرف چالان جاری کیا جائے گا تو وہ شخص کارروائی کے بعد چلا جائے گا۔ پولیس چیف کے مطابق سابقہ ضابطوں کے تحت پولیس اہلکار اس بات کے پابند تھے کہ اگر چیکنگ کے دوران کسی فرد کے نام کے ساتھ انتظامی وارنٹ منسلک پایا جاتا تو وہ فوری طور پر آئی سی ای کو مطلع کرتے تھے۔ اب یہ طریقہ کار تبدیل کر دیا گیا ہے اور صرف جیل بھیجے جانے والے ملزمان کے حوالے سے ہی وفاقی ادارے کو اطلاع دی جائے گی۔
مئیر جان وائٹ مائر نے اس پالیسی تبدیلی کا اعلان کرتے ہوئے بتایا کہ انہوں نے یہ فیصلہ کمیونٹی کے اندر پائے جانے والے خوف اور ذہنی دباؤ میں کمی لانے کے لیے کیا ہے۔ انہوں نے اس موقع پر امریکی کانگریس سے بھی مطالبہ کیا کہ وفاقی امیگریشن قوانین میں تبدیلیاں لائی جائیں اور آئی سی ای کے اہلکاروں کو بہتر تربیت، باڈی کیمروں کا استعمال اور حالات کو قابو میں رکھنے کی ٹریننگ دی جائے۔ انہوں نے واضح کیا کہ وہ صرف اپنے اختیارات کے دائرہ کار میں ہی احکامات جاری کر سکتے ہیں جبکہ ضابطے واشنگٹن میں ہی تبدیل ہو سکتے ہیں۔
اس پالیسی تبدیلی پر ردعمل کا اظہار کرتے ہوئے ڈیپارٹمنٹ آف ہوم لینڈ سیکیورٹی کے ترجمان نے اپنے بیان میں کہا کہ ہمیں مایوسی ہے کہ سیاستدان آئی سی ای کے ساتھ تعاون محدود کرنے کی کوشش کرتے ہیں، جبکہ ہمارے قانون نافذ کرنے والے اہلکار کمیونٹیز کی خدمت اور تحفظ کے اپنے فرائض پورے کر رہے ہیں۔ ترجمان کا مزید کہنا تھا کہ قانون نافذ کرنے والے اداروں کے ساتھ شراکت داریاں ملک بھر میں مجرمانہ غیر قانونی تارکینِ وطن کو گرفتار کرنے کے لیے ضروری وسائل حاصل کرنے کی خاطر انتہائی اہم ہیں۔
دوسری جانب ریاست ٹیکساس کے ایک اور شہر آسٹن میں بھی اسی نوعیت کی پالیسی پر عمل درآمد کا آغاز کر دیا گیا ہے۔ حال ہی میں ہونے والے انتخابات کے نتائج کے بعد ریاست ٹیکساس کی سیاسی فضا میں نمایاں تبدیلیاں دیکھنے میں آئی ہیں جہاں ڈیموکریٹک پارٹی کے امیدواروں نے کامیابیاں حاصل کی ہیں۔
اپنی رائے دیں