پاکستان ٹیسٹ ٹیم کے کپتان بابر اعظم کا کہنا ہے کہ قومی ٹیسٹ سکواڈ میں نوجوان اور باصلاحیت کھلاڑیوں کو شامل کرنے کا بنیادی مقصد آئندہ ورلڈ ٹیسٹ چیمپئن شپ کے لیے ایک مضبوط اور متوازن ٹیم تیار کرنا ہے۔
راولپنڈی کرکٹ سٹیڈیم میں پریس کانفرنس کرتے ہوئے بابر اعظم نے کہا کہ انگلینڈ کے دورے کے بعد قومی ٹیم کے مستقبل کو مدنظر رکھتے ہوئے نئی حکمت عملی اپنانے کا فیصلہ کیا گیا ہے۔
انہوں نے بتایا کہ موجودہ ٹیسٹ چیمپئن شپ میں پاکستان کی صورتحال کے باعث اب تمام تر توجہ اگلے ورلڈ ٹیسٹ چیمپئن شپ سائیکل کی تیاریوں پر مرکوز کر دی گئی ہے۔
کپتان کے مطابق اسی منصوبے کے تحت ٹیم میں چھ سے آٹھ نئے کھلاڑی شامل کیے گئے ہیں جن کا انتخاب فرسٹ کلاس اور پاکستان اے ٹیم کی حالیہ کارکردگی کو دیکھ کر کیا گیا ہے۔
بابر اعظم نے کہا کہ سینئر اور جونیئر کھلاڑیوں کا متوازن امتزاج ٹیم کو نئی توانائی فراہم کرے گا اور نوجوان کرکٹرز کو اپنی صلاحیتیں دکھانے کے بہترین مواقع ملیں گے۔
ان کا کہنا تھا کہ حالیہ ٹرائی نیشن سیریز کی کامیابی سے حاصل ہونے والے اعتماد اور مثبت سوچ کو سری لنکا کے خلاف ٹیسٹ سیریز میں بھی برقرار رکھنے کی کوشش کی جائے گی۔
بطور کپتان اپنی ذمہ داریوں کا ذکر کرتے ہوئے انہوں نے واضح کیا کہ سلیکٹرز کی جانب سے دیے گئے 15 کھلاڑیوں میں سے بہترین پلیئنگ الیون کو میدان میں اتارنا اور ان سے کارکردگی حاصل کرنا ان کی بنیادی ذمہ داری ہے۔
انہوں نے مزید کہا کہ ٹیم کی تشکیل میں سلیکٹرز اور کوچز کے ساتھ باہم مشاورت کی جاتی ہے تاکہ بہترین ممکنہ فیصلے کیے جا سکیں۔
اپنی انفرادی فارم کے بارے میں بات کرتے ہوئے بابر اعظم نے تسلیم کیا کہ بیٹنگ کے شعبے میں مزید بہتری کی گنجائش موجود ہے جس کے لیے وہ کوچز کے ساتھ مل کر کام کر رہے ہیں۔
سابق کپتان محمد یوسف کے تجزیے سے متعلق ایک سوال پر انہوں نے کہا کہ سیکھنے کا عمل کبھی ختم نہیں ہوتا، محمد یوسف پاکستان کے لیجنڈ بیٹر ہیں اور اگر ان سے رابطہ ہوا تو ان سے ضرور رہنمائی حاصل کریں گے۔
نوجوان کھلاڑیوں پر دباؤ کا ذکر کرتے ہوئے بابر اعظم کا کہنا تھا کہ سینئر کھلاڑی کی حیثیت سے ان کی کوشش ہوتی ہے کہ وہ نئے کھلاڑیوں کے ساتھ اپنا تجربہ شیئر کریں اور مشکل حالات میں انہیں اعتماد دیں۔
انہوں نے کہا کہ راولپنڈی میں ہوم گراؤنڈ پر کھیلنا ہمیشہ خاص ہوتا ہے اور وہ شائقین کی توقعات پر پورا اترنے کے لیے سو فیصد کارکردگی دکھانے کی کوشش کرتے ہیں۔
پاکستان اور سری لنکا کے درمیان دو ٹیسٹ میچوں پر مشتمل ورلڈ ٹیسٹ چیمپئن شپ سیریز کا پہلا میچ راولپنڈی کرکٹ سٹیڈیم میں شروع ہو رہا ہے۔
اپنی رائے دیں