کراچی کے جناح اسپتال میں بجلی کی بلا تعطل فراہمی کی سہولت کے باوجود جنریٹرز کے لیے لاکھوں روپے کے ڈیزل کی خریداری کا انکشاف ہوا ہے، اور مالی سال کے ابتدائی تین ماہ کے دوران اس مد میں باون لاکھ روپے سے زائد خرچ کیے گئے۔
دستاویزات کے مطابق جولائی سے ستمبر کے دوران اسپتال کے جنریٹرز کے لیے ڈیزل کے استعمال پر مجموعی طور پر باون لاکھ چھپن ہزار دو سو اڑتالیس روپے کی لاگت آئی، جبکہ اس ادارے کو بجلی کی لوڈشیڈنگ سے مکمل استثنیٰ حاصل ہے۔
گزشتہ سے پیوستہ شب طویل بجلی کے بریک ڈاؤن کے دوران اسپتال کے ہنگامی جنریٹرز کام کرنے میں ناکام رہے، جس کے باعث آئی سی یو میں زیر علاج دو مریضوں کے جاں بحق ہونے کی اطلاعات آئیں اور دیگر مریضوں کی حالت بھی متاثر ہوئی۔
اسپتال انتظامیہ نے مریضوں کی اموات کا بجلی کی بندش سے تعلق مسترد کرتے ہوئے موقف اپنایا کہ وہ پہلے ہی شدید علیل اور تشویشناک حالت میں تھے، اور ان کی موت طبی پیچیدگیوں کے باعث واقع ہوئی۔
کے الیکٹرک کے ترجمان نے واضح کیا ہے کہ جناح اسپتال کو لوڈشیڈنگ سے استثنیٰ حاصل ہے، اور بجلی کی فراہمی میں تعطل کا واقعہ اندرونی نظام میں خرابی کا نتیجہ تھا جس کا کمپنی کے انفرااسٹرکچر سے کوئی تعلق نہیں۔
اسپتال کے ڈپٹی ڈائریکٹر ڈاکٹر یحییٰ تنیو نے جنریٹرز فعال نہ ہونے کی وجہ سافٹ ویئر کی تکنیکی خرابی بتائی اور کہا کہ فنی فالٹس یا چیکنگ کے لیے جنریٹرز چلائے جاتے ہیں، تاہم تین ماہ کے دوران ڈیزل کی مقدار کے اعدادوشمار فی الحال ان کے پاس موجود نہیں۔
اپنی رائے دیں