اسلام آباد میں پاکستان سپورٹس کمپلیکس کے اندر تین روزہ پاکستان ٹورازم، سپورٹس اینڈ فیملی فیسٹیول پورے جوش و خروش کے ساتھ جاری ہے۔ اس تقریب کا مقصد ملک کے مختلف سیاحتی مقامات، ثقافتی مظاہروں اور خاندانی تفریح کے مواقع کو ایک پلیٹ فارم پر یکجا کرنا ہے۔
وزارت بین الصوبائی رابطہ کی قیادت میں منعقد ہونے والے اس فیسٹیول کا مرکزی انتظامی ادارہ پاکستان ٹورازم ڈویلپمنٹ کارپوریشن ہے جہاں سیاحت سے وابستہ افراد، سفارتی برادری اور نوجوان بڑی تعداد میں شریک ہیں۔
فیسٹیول کے احاطے میں پیراگلائیڈنگ، پیرا موٹر فلائنگ، ہاٹ ایئر بیلون رائیڈز اور گھڑ سواری سمیت مختلف ایڈونچر سرگرمیوں کا خاص اہتمام کیا گیا ہے۔ ہیوی بائیکس اور گاڑیوں کی نمائش بھی یہاں آنے والے شائقین کی توجہ کا بڑا مرکز بنی ہوئی ہے۔
ملک کے چاروں صوبوں اور مختلف خطوں کی نمائندگی کرنے والے اسٹالز پر علاقائی روایات، تاریخی ورثے اور روایتی کھانوں کو متعارف کروایا جا رہا ہے۔ سفارتی مشنز کے قائم کردہ اسٹالز نے بھی ثقافتی سفارت کاری کے فروغ میں اہم کردار ادا کیا ہے۔
خاتون ہنرمندوں اور دستکاروں نے اپنے ہاتھوں سے بنی روایتی اشیاء اور ثقافتی مصنوعات یہاں نمائش کے لیے رکھی ہیں۔ اس کے علاوہ فیسٹیول میں میڈیکل ٹورازم زون بھی قائم کیا گیا ہے جہاں طبی اداروں اور لیبارٹریوں کی جانب سے اپنی خدمات پیش کی جا رہی ہیں۔
موسیقی کے پروگراموں میں معروف فنکاروں نمرہ مہرہ، ڈی آر جی، اعجاز حسین اور بشریٰ مروئی نے اپنے فن کا مظاہرہ کیا۔ ڈھول پرفارمر محمد زمان شیخ، دتو لعل اور پنجاب جھومر ڈانس گروپ نے علاقائی لوک ثقافت کے رنگ بکھیرے۔
افتتاحی تقریب سے خطاب کرتے ہوئے وفاقی وزیر برائے منصوبہ بندی، ترقی و خصوصی اقدامات احسن اقبال نے کہا کہ حکومت پاکستان کو عالمی سطح پر ایک متحد سیاحتی منزل کے طور پر متعارف کرانے کے لیے پرعزم ہے۔
وزیراعظم کے معاون برائے سیاحت سردار یاسر الیاس خان نے اپنے خطاب میں کہا کہ یہ فیسٹیول ملک کے قدرتی حسن، ثقافتی ورثے اور سرمایہ کاری کے مواقع اجاگر کرنے کا بہترین پلیٹ فارم ہے۔
بچوں کی تفریح کے لیے فیسٹیول میں خصوصی کھیل اور سرگرمیاں بھی مختص کی گئی ہیں تاکہ ہر عمر کے افراد اپنی پسند کے مطابق لطف اندوز ہو سکیں۔ یہ تین روزہ فیسٹیول اتوار کے روز اختتام پذیر ہوگا جس کی آخری رات موسیقی، فلائنگ لالٹینز اور آتش بازی کے مظاہرے کیے جائیں گے۔
اپنی رائے دیں