پاکستان کرکٹ بورڈ 2026-27 کے سیزن کے لیے سینٹرل کنٹریکٹس کی فہرست میں بڑی تبدیلیوں کی تیاری کر رہا ہے۔ ہیڈ کوچ مائیک ہیسن نے بورڈ حکام کو تجویز دی ہے کہ مستقبل کے پیشِ نظر نوجوان کھلاڑیوں کو ٹیم میں شامل کیا جائے تاکہ قومی اسکواڈ کو مزید مستحکم بنایا جا سکے۔
ذرائع کے مطابق مائیک ہیسن نے فٹنس، حکمتِ عملی، مسلسل بہتری اور ڈریسنگ روم کے مثبت ماحول کو کھلاڑیوں کے انتخاب کا بنیادی معیار قرار دیا ہے۔ نئی فہرست میں عرفات منہاس، سعد بیگ، حسن نواز، عاکف جاوید، علی رضا، احسن دانیال، سفیان مقیم، معاذ صداقت، رضا اللہ، اذان اویس، عمران رندھاوا، عبداللہ فضل اور غازی غوری جیسے ابھرتے ہوئے کھلاڑیوں کو شامل کیے جانے کا امکان ہے۔
دوسری جانب سینئر کھلاڑیوں کے حوالے سے اطلاعات ہیں کہ محمد رضوان اور امام الحق کو سینٹرل کنٹریکٹس سے باہر رکھا جا سکتا ہے۔ تاہم فارمیٹ کپتان بابر اعظم، شاہین شاہ آفریدی اور صاحبزادہ فرحان کے ساتھ ساتھ سلمان علی آغا، سعود شکیل، حارث رؤف، نسیم شاہ، فخر زمان اور صائم ایوب اپنی جگہ برقرار رکھنے میں کامیاب ہو سکتے ہیں، البتہ ان کے کنٹریکٹس کو فارمیٹ کے لحاظ سے محدود کیا جا سکتا ہے۔
پاکستان کرکٹ بورڈ نے گزشتہ کنٹریکٹس 31 جولائی کو ختم ہونے کے بعد نئے معاہدوں کے اعلان میں تاخیر کی تھی تاکہ کھلاڑیوں کی کارکردگی کا تفصیلی جائزہ لیا جا سکے۔ بورڈ اب ڈومیسٹک اور بین الاقوامی مقابلوں میں کھلاڑیوں کی کارکردگی کو مدنظر رکھتے ہوئے حتمی فہرست کا اعلان کرے گا۔
اپنی رائے دیں