اسلام آباد میں قومی اسمبلی کے اجلاس کے دوران وقفہ سوالات میں اس وقت دلچسپ صورتحال پیدا ہو گئی جب پارلیمانی سیکرٹری برائے آئی ٹی سبین غوری فائیو جی ٹیکنالوجی کے بارے میں پوچھے گئے بنیادی سوال کا جواب دینے میں ناکام رہیں۔
اجلاس کی صدارت کرنے والے پینل آف چیئرپرسن عبدالقادر پٹیل نے پارلیمانی سیکرٹری سے فائیو جی کا مطلب دریافت کیا، جس پر وہ اچانک گڑبڑا گئیں اور اس کا واضح جواب نہ دے سکیں۔
سبین غوری نے اپنی لاعلمی کا اعتراف کرتے ہوئے کہا کہ اس وقت فائیو جی کا مطلب ان کے ذہن میں نہیں آ رہا، تاہم انہوں نے ایوان کو آگاہ کیا کہ ملک کے 24 شہروں میں فائیو جی سروس فراہم کی جا رہی ہے۔
انہوں نے مزید کہا کہ اس ٹیکنالوجی سے انٹرنیٹ کی رفتار میں نمایاں اضافہ ہوگا اور باقی شہروں میں بھی اس کی فراہمی کو یقینی بنانے کے لیے بنیادی ڈھانچے اور سروسز کو بہتر بنایا جا رہا ہے۔
اس موقع پر پیپلز پارٹی کی رکن آصفہ بھٹو زرداری نے دلچسپ جملہ کستے ہوئے کہا کہ اگر پارلیمانی سیکرٹری کو فائیو جی کا مطلب معلوم نہیں ہے تو وہ ہمارے ساتھ آ کر بیٹھ جائیں، ہم انہیں سمجھا دیں گے۔
پریذائیڈنگ افسر عبدالقادر پٹیل نے طنزیہ انداز میں سوال کیا کہ کیا فور جی ٹیکنالوجی انتقال کر گئی ہے جو اب فائیو جی لائی جا رہی ہے؟ ان کے اس سوال پر ایوان میں موجود اراکین محظوظ ہوتے رہے۔
اجلاس کے دوران اراکین اسمبلی نے ملک بھر میں انٹرنیٹ سروسز کی سست روی پر شدید تحفظات کا اظہار کیا اور کہا کہ موجودہ دور میں انٹرنیٹ کا معیار انتہائی متاثر کن ہے جس سے عوام کو مشکلات کا سامنا ہے۔
اراکین نے حکومت سے مطالبہ کیا کہ انٹرنیٹ کی فراہمی کو بہتر بنانے کے لیے عملی اقدامات کیے جائیں، کیونکہ موجودہ صورتحال میں ڈیجیٹل ترقی کے اہداف کا حصول مشکل دکھائی دیتا ہے۔
پارلیمانی سیکرٹری نے ایوان کو یقین دلایا کہ حکومت انٹرنیٹ کے معیار کو بہتر بنانے کے لیے کوشاں ہے اور جلد ہی ملک بھر میں ٹیکنالوجی کی فراہمی کو مربوط اور تیز تر بنایا جائے گا۔
واضح رہے کہ پاکستان میں فائیو جی ٹیکنالوجی کے تعارف کے حوالے سے حکومتی سطح پر مختلف مراحل جاری ہیں، جس کا مقصد ملک کو ڈیجیٹل معیشت کی جانب گامزن کرنا ہے۔
آئی ٹی کے شعبے میں بہتری لانے کے لیے حکومت نے کئی منصوبے شروع کر رکھے ہیں، تاہم پارلیمنٹ میں ہونے والی اس بحث نے ٹیکنالوجی کے بارے میں آگاہی اور حکومتی کارکردگی پر سوالات اٹھا دیے ہیں۔
اجلاس کے دوران خیبر پختونخوا کے 12 اضلاع کے مالی معاملات صوبائی حکومت سے وفاق کو منتقل کرنے کا فیصلہ بھی زیر بحث آیا، جس پر اراکین نے اپنے اپنے تحفظات کا اظہار کیا۔
قومی اسمبلی کا یہ اجلاس ٹیکنالوجی اور حکومتی پالیسیوں کے حوالے سے اراکین کے درمیان ہونے والی گرما گرم بحث کی وجہ سے خبروں میں رہا، جہاں اپوزیشن نے حکومتی کارکردگی پر تنقید کے نشتر چلائے۔
اپنی رائے دیں