گیس کے چولہے کا استعمال ہر گھر میں روزمرہ کی بنیاد پر کیا جاتا ہے اور اس دوران اس کے جلنے والے شعلوں پر توجہ دینا انتہائی ضروری ہوتا ہے۔ ماہرین کے مطابق گیس کے چولہوں میں بعض اوقات ایسے خطرات بھی چھپے ہوتے ہیں جن کا تعلق براہ راست فضائی معیار اور انسانی جان سے ہوتا ہے۔
عام طور پر گیس کے چولہوں سے نکلنے والے شعلے نیلے رنگ کے ہوتے ہیں جن میں ہلکی سی کسی دوسرے رنگ کی آمیزش بھی ہو سکتی ہے۔ قدرتی گیس کے شعلے میں نیلے رنگ کے ساتھ اوپر کی جانب معمولی سی سفیدی کا نظر آنا بالکل نارمل مانا جاتا ہے۔
اسی طرح ایل پی جی گیس استعمال کرنے کی صورت میں نیلے شعلے کے ساتھ ہلکی سی زردی مائل رنگت بھی عام اور محفوظ سمجھی جاتی ہے۔ تاہم جب شعلے کا بیشتر حصہ کسی غیر معمولی رنگ میں تبدیل ہو جائے تو یہ اس بات کا واضح اشارہ ہوتا ہے کہ کہیں کوئی خرابی موجود ہے۔
نیلے رنگ کے شعلے اس بات کا عندیہ دیتے ہیں کہ گیس کا عملِ احتراق یعنی جلنے کا عمل مکمل طور پر ہو رہا ہے۔ قدرتی گیس زیادہ تر میتھین گیس پر مشتمل ہوتی ہے جو چولہے میں درست طریقے سے جلنے پر حرارت، پانی کے بخارات اور کاربن ڈائی آکسائیڈ میں تبدیل ہوتی ہے۔
تاہم اگر آپ کے چولہے میں جلنے والے شعلے کی رنگت میں اورنج یا نارنجی رنگ کا غلبہ نظر آنے لگے تو اس کا مطلب ہے کہ گیس کا احتراق مکمل نہیں ہو رہا۔ اس طرح کے مسائل اکثر گندے چولہوں، ہوا میں موجود گرد و غبار یا نمی کی وجہ سے پیدا ہوتے ہیں۔
اس کے علاوہ برنر کے سوراخ بند ہو جانے، ہوا کی مناسب فراہمی میں کمی واقع ہونے یا پھر برنر کی کسی خرابی کے باعث بھی شعلے کی رنگت تبدیل ہو سکتی ہے۔ تمام وجوہات اتنی خطرناک نہیں ہوتیں لیکن احتیاط برتنا ضروری ہے۔
اگر شعلے میں مسلسل پیلے، سرخ یا اورنج رنگ کا غلبہ برقرار رہے تو ایسی صورت میں فوری طور پر چولہے کو کسی ماہر کاریگر سے چیک کروانا چاہیے۔ مسلسل اورنج رنگ کے شعلے نامکمل احتراق اور خطرناک کاربن مونو آکسائیڈ کے اخراج کا خطرہ پیدا کرتے ہیں۔
کاربن مونو آکسائیڈ ایک ایسی خطرناک گیس ہے جو بے رنگ اور بے بو ہونے کے باعث آسانی سے محسوس نہیں کی جا سکتی۔ یہ گیس انسانی زندگی کے لیے بھی انتہائی نقصان دہ اور جان لیوا ثابت ہو سکتی ہے۔
اس خطرناک گیس کے علاوہ اورنج رنگ کے شعلے کا ایک اور بڑا نقصان یہ ہے کہ اس دوران گیس زیادہ مقدار میں ضائع ہوتی ہے۔ گیس کے اس بے دریغ ضیاع کا نتیجہ یہ نکلتا ہے کہ ماہانہ گیس کے بلوں میں ہوشربا اضافہ ہو جاتا ہے۔
گیس کے نامکمل جلنے اور اورنج شعلوں کی وجہ سے نہ صرف توانائی کا ضیاع ہوتا ہے بلکہ گھر کا اندرونی فضائی معیار بھی شدید متاثر ہوتا ہے۔ فضائی آلودگی میں اضافے سے گھر میں موجود افراد کی صحت پر بھی منفی اثرات مرتب ہو سکتے ہیں۔
ماہرینِ امورِ خانہ داری اور گیس اپلائنسز کے ماہرین کا مشورہ ہے کہ چولہے کو ہمیشہ صاف ستھرا رکھا جائے تاکہ برنر کے سوراخ کھلے رہیں۔ برنر کی باقاعدگی سے صفائی اور دیکھ بھال سے اس طرح کے مسائل سے باآسانی بچا جا سکتا ہے۔
اگلی بار جب بھی آپ باورچی خانے میں کھانا پکانے کے لیے چولہا جلائیں تو اس کے شعلوں کی رنگت پر لازمی نظر رکھیں۔ اگر شعلے نیلے رنگ کے بجائے اورنج یا پیلے دکھائی دیں تو فوری طور پر ضروری اقدامات کریں تاکہ کسی بھی بڑے حادثے سے محفوظ رہا جا سکے۔
اپنی رائے دیں