بالی ووڈ کی معروف اور سینئر اداکارہ جیا بچن نے بالی ووڈ کے سپر اسٹار امیتابھ بچن کے ساتھ اپنے تعلقات کے ابتدائی دنوں اور پہلی ملاقات کے حوالے سے دلچسپ انکشافات کیے ہیں جو مداحوں کی توجہ کا مرکز بنے ہوئے ہیں۔
یہ انکشافات جیا بچن کی جانب سے سیمی گریوال کو دیے گئے ایک پرانے انٹرویو میں سامنے آئے ہیں جس میں انہوں نے اپنی ذاتی زندگی اور فلمی سفر کے اس دور پر روشنی ڈالی جب وہ اور امیتابھ بچن ایک دوسرے کے قریب آرہے تھے۔
اداکارہ جیا بچن نے انٹرویو کے دوران بتایا کہ جب انہوں نے پہلی بار امیتابھ بچن کو دیکھا تھا تو انہیں ایک عجیب سا خطرہ محسوس ہوا تھا اور وہ کسی حد تک گھبرا بھی گئی تھیں۔
انہوں نے اپنی اس کیفیت کی وضاحت کرتے ہوئے کہا کہ امیتابھ ان کی زندگی میں واحد ایسے شخص تھے جو ان پر اپنی مرضی مسلط کرنے یا حکم چلانے کی مکمل صلاحیت رکھتے تھے اور وہ خود بھی خوشی خوشی انہیں یہ اختیار دینے کے لیے تیار ہو گئی تھیں۔
جیا بچن نے امیتابھ بچن کی شخصیت کے بارے میں بات کرتے ہوئے بتایا کہ سپر اسٹار ابتدائی دنوں میں کافی کم گو اور حد سے زیادہ حساس طبیعت کے مالک تھے جنہیں سمجھنا ہر ایک کے لیے آسان نہیں ہوتا تھا۔
دونوں فنکاروں کی پہلی ملاقات کے حوالے سے بات کرتے ہوئے اداکارہ نے بتایا کہ ان کی یہ ملاقات پونا کے فلم اینڈ ٹیلی ویژن انسٹی ٹیوٹ آف انڈیا میں ہوئی تھی جہاں سے ان کے باہمی تعارف کا آغاز ہوا۔
بعد ازاں دونوں کو معروف فلمساز ہری کیش مکھرجی کی مشہور فلم گڈی کے لیے کاسٹ کیا گیا تھا تاہم بعض وجوہات کی بنا پر بعد میں امیتابھ بچن کو اس فلم سے الگ کر دیا گیا تھا اور ان کی جگہ کسی اور کو موقع ملا تھا۔
جیا بچن نے انٹرویو میں مزید بتایا کہ امیتابھ بچن کی لوگوں کو مسلسل گھورنے کی عادت انہیں شروع میں بڑی عجیب لگتی تھی لیکن بعد میں انہیں اندازہ ہوا کہ وہ ایسا جان بوجھ کر نہیں کرتے تھے۔
اداکارہ کے مطابق امیتابھ کو اس بات کا بالکل معلوم ہی نہیں ہوتا تھا کہ ان کے اس انداز کا سامنے والے شخص پر کیا تاثر پڑتا ہے اور وہ بے ساختہ ہی اس طرح دیکھا کرتے تھے۔
جیا بچن کا کہنا تھا کہ امیتابھ وہ واحد شخص تھے جن کی ہر بات وہ ماننا چاہتی تھیں اور انہیں خوش رکھنا ان کی زندگی کی سب سے بڑی ترجیح بن گئی تھی حالانکہ امیتابھ نے کبھی بھی ان پر کوئی حکم نہیں چلایا تھا۔
شادی کی پیشکش کے حوالے سے ایک یادگار بات بتاتے ہوئے جیا بچن نے انکشاف کیا کہ امیتابھ نے انہیں کبھی باقاعدہ طور پر شادی کی پیشکش نہیں کی تھی لیکن ان کے چھوٹے موٹے انداز نے انہیں بہت متاثر کیا۔
انہوں نے یاد کرتے ہوئے بتایا کہ امیتابھ پونا تک پانچ گھنٹے گاڑی چلا کر گریجویشن کی تقریب میں شرکت کے لیے پہنچے تھے اور تحفے میں انہیں کانجی ورم کی ساڑھیاں بھی دی تھیں جن سے ان کے دل میں ان کے لیے خاص جگہ بن گئی۔
واضح رہے کہ بالی ووڈ کی معروف اور سینئر اداکارہ جیا بچن اور سپر اسٹار امیتابھ بچن کی شادی 1973 میں ہوئی تھی اور وہ پچھلے 5 دہائیوں سے زیادہ عرصے سے کامیاب ازدواجی زندگی گزار رہے ہیں۔
ان دونوں فنکاروں کا شمار بالی ووڈ کے سب سے زیادہ طاقتور اور مقبول جوڑوں میں ہوتا ہے جنہوں نے نہ صرف حقیقی زندگی میں ایک دوسرے کا ساتھ دیا بلکہ پردے پر بھی بہترین اداکاری کے جوہر دکھائے۔
دونوں کی ازدواجی زندگی کو بالی ووڈ کی دنیا میں ایک مثال کے طور پر دیکھا جاتا ہے اور مداح ان کی باہمی محبت اور خلوص کو آج بھی بے حد سراہتے ہیں۔
اپنی رائے دیں