اسلام آباد میں نیشنل سائبر ایمرجنسی رسپانس ٹیم کی جانب سے ملک کے سرکاری اور مالیاتی اداروں سمیت اہم ڈیجیٹل نظاموں پر ممکنہ سائبر حملوں کے حوالے سے ایک سخت ایڈوائزری جاری کی گئی ہے جس میں متعلقہ اداروں کو فوری طور پر حفاظتی اقداماتن اپنانے کا کہا گیا ہے۔
حالیہ انکشافات کے مطابق ای مَدھرا کے ڈیجیٹل سیکیورٹی سرٹیفکیٹس میں پائے جانے والی تکنیکی خامیوں کی وجہ سے ملک کے اہم انفارمیشن انفرا اسٹرکچر کو شدید خطرات کا سامنا ہے اور سرکاری و مالیاتی نیٹ ورکس خطرے کی زد میں آسکتے ہیں۔
ذرائع سے یہ بات سامنے آئی ہے کہ ای مَدھرا کی سرٹیفکیٹ اتھارٹی کی کل آٹھ نجی سیکیورٹی کیز اس مسئلے سے متاثر ہوئی ہیں جن میں سے چھ کا تعلق ٹی ایل ایس سرٹیفکیٹس سے جبکہ دو کا تعلق کوڈ سائننگ کے عمل سے ہے۔
ان کمزور اور متاثرہ کیز کی موجودگی کی وجہ سے بدنیتی پر مبنی عناصر کے لیے جعلی ڈیجیٹل سرٹیفکیٹس کی تیاری کا راستہ کھل سکتا ہے جس سے سیکیورٹی کے معاملات مزید پیچیدہ ہو رہے ہیں۔
اس سنگین صورتحال کے پیش نظر سرکاری اور نجی نوعیت کی اہم ویب سائٹس اور آن لائن سروسز کی ہو بہو نقل تیار کیے جانے کا خطرہ بھی شدت اختیار کر گیا ہے جو عام صارفین کے لیے نقصان دہ ثابت ہو سکتا ہے۔
اس کے علاوہ انٹرنیٹ ٹریفک کے اندر غیر مجاز مداخلت کیے جانے، صارفین کی آن لائن سرگرمیوں کی نگرانی اور ڈیجیٹل ڈیٹا کے اندر ردوبدل کیے جانے کے امکانات بھی ظاہر کیے گئے ہیں۔
نیشنل سرٹ کی جانب سے جاری کردہ ہدایات میں متعلقہ تمام اداروں کو اپنے آپریٹنگ سسٹمز، ویب براؤزرز اور دیگر تمام سافٹ ویئر کو فوری طور پر اپ ڈیٹ کرنے کی سختی سے تاکید کی گئی ہے۔
ایڈوائزری میں اس بات پر بھی زور دیا گیا ہے کہ متاثرہ اور غیر محفوظ سرٹیفکیٹس کو فوری طور پر بلاک کیا جائے اور اداروں کے سیکیورٹی ٹرسٹ اسٹورز کو بھی نئے تقاضوں کے مطابق اپ ڈیٹ کیا جائے۔
دوسری جانب وہ موبائل ایپلیکیشنز، کمپیوٹر سافٹ ویئر اور دیگر ڈیجیٹل سسٹمز جو اپنے الگ سرٹیفکیٹ اسٹورز استعمال کرتے ہیں، انہیں بھی خصوصی طور پر حفاظتی اقدامات مکمل کرنے کی ہدایت دی گئی ہے۔
متعلقہ اداروں کو یہ بھی ہدایت دی گئی ہے کہ وہ اپنے نیٹ ورکس پر کسی بھی قسم کے مشکوک سرٹیفکیٹس، غیر معمولی سرگرمیوں اور کنکشن ری ڈائریکشن کے واقعات پر کڑی نظر رکھیں۔
ڈیجیٹل سیکیورٹی کو یقینی بنانے کے لیے یہ بھی کہا گیا ہے کہ جعلی سرٹیفکیٹس کے استعمال یا ڈیٹا انٹرسیپشن کے کسی بھی مشتبہ واقعے کی فوری اطلاع نیشنل سرٹ پاکستان کو فراہم کی جائے۔
اس نوعیت کے اقدامات کا مقصد ملکی ڈیجیٹل اثاثوں کا تحفظ کرنا اور کسی بھی ممکنہ بڑے سائبر حملے کو بروقت ناکام بنانا ہے تاکہ سرکاری و مالیاتی تنصیبات محفوظ رہیں۔
اپنی رائے دیں