پاکستان نے باضابطہ طور پر 24 رکنی بین الحکومتی گروپ (جی 24) کی سربراہی سنبھال لی ہے، جس کے ساتھ ہی وفاقی وزیر خزانہ سینیٹر محمد اورنگزیب نے عالمی مالیاتی نظام میں اصلاحات اور ترقی پذیر ممالک کے لیے مضبوط نمائندگی کا مطالبہ کیا ہے۔
وزارتِ خزانہ کے مطابق، پاکستان نے یہ ذمہ داری سنبھالتے ہوئے ایک زیادہ جوابدہ اور منصفانہ عالمی مالیاتی ڈھانچے کے قیام کے عزم کا اعادہ کیا ہے تاکہ موسمیاتی چیلنجز اور ترقیاتی مالیاتی فرق سے نمٹا جا سکے۔
وزیر خزانہ محمد اورنگزیب نے اپنی صدارت کے لیے تین اہم اسٹریٹجک ترجیحات کا خاکہ پیش کیا ہے، جن میں عالمی پالیسی سازی میں ترقی کو مرکزیت دینا، کثیر الجہتی اداروں کا استحکام اور پائیدار ترقی کے لیے مالی وسائل کی فراہمی شامل ہے۔
سینیٹر اورنگزیب نے کہا کہ عالمی بینک اور آئی ایم ایف جیسے اداروں کو اپنے اراکین کی بدلتی ہوئی ضروریات کے مطابق فیصلہ سازی کے عمل کو مزید شفاف اور جامع بنانا ہوگا۔
انہوں نے مزید کہا کہ پاکستان کی سربراہی مشاورت اور اتفاق رائے کے اصولوں پر مبنی ہوگی، جس میں ایشیا، افریقہ اور لاطینی امریکہ کے رکن ممالک کے ساتھ قریبی تعاون کیا جائے گا۔
وفاقی وزیر نے سبکدوش ہونے والی نائجیریا کی قیادت کی کوششوں کو سراہتے ہوئے اس بات پر زور دیا کہ اجتماعی قیادت کا مقصد ٹھوس ترقیاتی نتائج کا حصول ہے۔
پاکستان اس پلیٹ فارم کے ذریعے ترقی پذیر معیشتوں کی اجتماعی آواز کو مضبوط بنانے کے لیے پرعزم ہے تاکہ عالمی اقتصادی تقسیم کے مسائل کو حل کیا جا سکے۔
اپنی رائے دیں