اسلام آباد میں بچوں کے محفوظ ڈیجیٹل مستقبل کو یقینی بنانے کے لیے 'نیشنل پالیسی ڈائیلاگ آن سیف اسکرول' کا انعقاد کیا گیا۔ اس اہم تقریب کا اہتمام چائلڈ پروٹیکشن اینڈ ویلفیئر بیورو پنجاب اور وزارتِ انسانی حقوق نے یونیسف پاکستان اور یو این ایف پی اے کے تعاون سے کیا۔
اس مکالمے کا بنیادی مقصد بچوں کو آن لائن دنیا میں درپیش خطرات سے محفوظ رکھنا، سوشل میڈیا کے ذمہ دارانہ استعمال کو فروغ دینا اور اس حوالے سے مؤثر قانونی و پالیسی اقدامات کے لیے قومی سطح پر مشاورت کو آگے بڑھانا تھا۔
چائلڈ پروٹیکشن اینڈ ویلفیئر بیورو پنجاب کی چیئرپرسن سارہ احمد نے تقریب سے خطاب کرتے ہوئے بچوں کے آن لائن تحفظ کے لیے 10 اہم سفارشات پیش کیں۔ انہوں نے ڈیجیٹل دور میں بچوں کے حقوق، رازداری اور سلامتی کے تحفظ کو وقت کی اہم ضرورت قرار دیا۔
سارہ احمد کی جانب سے پیش کردہ سفارشات میں 16 سال سے کم عمر بچوں کے سوشل میڈیا اکاؤنٹس کے لیے والدین کی تصدیق شدہ رضامندی اور عمر کی تصدیق کا ایک قابلِ اعتماد نظام متعارف کروانے پر زور دیا گیا ہے۔
انہوں نے وفاقی اور صوبائی اداروں کے مابین مؤثر رابطہ کاری، آن لائن شکایات پر فوری کارروائی، سائبر بُلنگ، ڈیجیٹل گرومنگ اور آن لائن ہراسانی کی روک تھام کے لیے مربوط اقدامات کو ناگزیر قرار دیا۔
اس موقع پر اسپیکر پنجاب اسمبلی ملک محمد احمد خان نے کہا کہ بچوں کا تحفظ ریاست اور معاشرے کی مشترکہ ذمہ داری ہے۔ انہوں نے بچوں کے آن لائن تحفظ کے لیے مؤثر قانون سازی اور ادارہ جاتی تعاون کو یقینی بنانے پر زور دیا۔
وفاقی وزیرِ مملکت برائے آئی ٹی و ٹیلی کمیونیکیشن شزہ فاطمہ خواجہ نے اپنے خطاب میں کہا کہ بچوں کو سائبر بُلنگ اور ڈیجیٹل گرومنگ سے بچانے کے لیے ایک مربوط حکمتِ عملی کی ضرورت ہے۔ انہوں نے ڈیجیٹل پلیٹ فارمز پر حفاظتی اقدامات کو مزید سخت کرنے کا مطالبہ کیا۔
آسٹریلوی ہائی کمشنر ٹموتھی کین نے بھی تقریب میں شرکت کی اور بچوں کے آن لائن تحفظ سے متعلق ایک پریزنٹیشن پیش کی۔ انہوں نے اس ضمن میں بین الاقوامی تجربات سے استفادہ کرنے اور باہمی تعاون کو فروغ دینے کی اہمیت پر روشنی ڈالی۔
نیشنل پالیسی ڈائیلاگ میں آئی ٹی کے ماہرین، قانونی مشیران، سول سوسائٹی کے نمائندگان اور نوجوانوں کی بڑی تعداد نے شرکت کی۔ شرکاء نے بچوں کے لیے سوشل میڈیا کی ریگولیشن اور ڈیجیٹل حقوق کے تحفظ پر تفصیلی تبادلہ خیال کیا۔
مختلف سیشنز کے دوران اس بات پر اتفاق کیا گیا کہ بچوں کو ڈیجیٹل دنیا کے مواقع سے مستفید ہونے کے ساتھ ساتھ آن لائن خطرات سے محفوظ رکھنے کے لیے حکومت، والدین اور ٹیکنالوجی پلیٹ فارمز کو مل کر کام کرنا ہوگا۔
تقریب کے شرکاء نے اس بات پر زور دیا کہ محفوظ اسکرولنگ ہر بچے کا بنیادی حق ہے، جس کے لیے جدید ٹیکنالوجی کے ساتھ ساتھ اخلاقی اور قانونی حدود کا تعین کرنا ضروری ہے۔
یہ مکالمہ بچوں کے حقوق کے تحفظ کے لیے جاری حکومتی کوششوں کا حصہ ہے، جس کا مقصد ڈیجیٹل دنیا میں بچوں کی حفاظت کو یقینی بنانا ہے۔
اپنی رائے دیں