پاکستان تحریک انصاف کی قومی اسمبلی اور سینیٹ کے ارکان پر مشتمل مشترکہ پارلیمانی پارٹی کا اجلاس منعقد ہوا، جس میں ملک کی موجودہ سیاسی، آئینی، امن و امان اور معاشی صورتحال کا تفصیلی جائزہ لیا گیا۔ اجلاس کے بعد ایک اہم قرارداد منظور کی گئی جس میں پارٹی کے مستقبل کے لائحہ عمل اور مطالبات کا احاطہ کیا گیا ہے۔
اجلاس میں بانی چیئرمین عمران خان کی قیادت، فیصلوں اور ان کے وژن پر غیر متزلزل وابستگی کا اعادہ کرتے ہوئے ان کی فوری رہائی کا مطالبہ کیا گیا۔ قرارداد میں کہا گیا کہ عمران خان اور بشریٰ بی بی کی قانونی تقاضوں کے مطابق رہائی یقینی بنائی جائے اور ان کے وکلا و اہلِ خانہ سے ملاقاتوں پر عائد پابندیاں ختم کی جائیں۔
پارلیمانی پارٹی نے سپریم کورٹ کی اگست 2026 کی ہدایات پر مکمل عمل درآمد کا مطالبہ کرتے ہوئے کہا کہ عمران خان کا آزادانہ طبی معائنہ کرایا جائے، شفا انٹرنیشنل ہسپتال میں علاج اور ان کے ذاتی معالج کی شمولیت کو یقینی بنایا جائے۔ ان کی صحت، عزت و وقار اور قانونی حقوق کا تحفظ ریاستی ذمہ داری ہے۔
خیبر پختونخوا میں ایمرجنسی اور گورنر راج کے نفاذ کو آئین اور صوبائی خودمختاری پر حملہ قرار دیتے ہوئے اسے مسترد کر دیا گیا۔ اجلاس میں مطالبہ کیا گیا کہ وزیراعلیٰ سہیل آفریدی کی سربراہی میں منتخب صوبائی حکومت کو بحال کیا جائے اور وزیراعلیٰ، اسپیکر بابر سلیم سواتی اور صوبائی صدر جنید اکبر خان سمیت گرفتار رہنماؤں کو فوری رہا کیا جائے۔
قرارداد میں تحریک انصاف کے گرفتار ارکانِ پارلیمنٹ، رہنماؤں اور کارکنوں کی رہائی کا مطالبہ کیا گیا۔ اجلاس میں شاہ محمود قریشی، ڈاکٹر یاسمین راشد، اعجاز چوہدری، عمر چیمہ اور دیگر رہنماؤں کی گرفتاریوں پر شدید تشویش کا اظہار کیا گیا اور انہیں سیاسی انتقام قرار دیا گیا۔
پارلیمانی پارٹی نے دہشت گردی کے خلاف کارروائیوں کو سیاسی مقاصد کے لیے استعمال کرنے کی مذمت کی۔ اجلاس میں کہا گیا کہ دہشت گردی کے خاتمے کے نام پر منتخب قیادت کو نشانہ بنانا وفاق اور صوبوں کے درمیان تعلقات کو نقصان پہنچا سکتا ہے۔
ملک میں امن و امان کی صورتحال پر تشویش کا اظہار کرتے ہوئے مسلح افواج، پولیس اور شہریوں کی قربانیوں کو سراہا گیا۔ قرارداد میں کہا گیا کہ تحریک انصاف کی جمہوری جدوجہد کو ریاست دشمنی کے طور پر پیش کرنے کی کوششیں قومی اتحاد کو کمزور کر رہی ہیں۔
اجلاس میں 8 فروری 2024 کے انتخابات کے مینڈیٹ کے احترام یا ملک میں نئے شفاف انتخابات کا مطالبہ کیا گیا۔ اس کے علاوہ 26 ویں اور 27 ویں آئینی ترامیم کی واپسی، عدلیہ کی آزادی اور اظہارِ رائے کے حقوق کی بحالی پر زور دیا گیا۔
معاشی بحران پر تشویش کا اظہار کرتے ہوئے قرارداد میں کہا گیا کہ مہنگائی اور بے روزگاری نے عوام کی کمر توڑ دی ہے۔ حکومت سے مطالبہ کیا گیا کہ معاشی سرگرمیوں کی بحالی کے لیے فوری اقدامات کیے جائیں تاکہ عوام کو ریلیف مل سکے۔
پارٹی قیادت کے حوالے سے اجلاس میں بیرسٹر گوہر علی خان، سلمان اکرم راجہ، محمود خان اچکزئی، راجہ ناصر عباس، وزیراعلیٰ سہیل آفریدی اور جنید اکبر خان سمیت دیگر نامزد عہدیداروں پر مکمل اعتماد کا اظہار کیا گیا۔ فیصلہ کیا گیا کہ پارٹی کے اندرونی معاملات متعلقہ فورمز پر ہی حل کیے جائیں گے۔
مشترکہ پارلیمانی پارٹی نے اس عزم کا اعادہ کیا کہ وہ عمران خان کی رہائی اور آئینی بالادستی کے لیے اپنی جدوجہد جاری رکھے گی۔ تمام پارلیمانی، سیاسی اور قانونی محاذوں پر مربوط حکمت عملی کے ساتھ آگے بڑھنے کا فیصلہ کیا گیا ہے۔
اپنی رائے دیں