وفاقی وزیر خزانہ محمد اورنگزیب آئی ایم ایف اور عالمی بینک کے سالانہ اجلاسوں میں شرکت کے لیے روانہ ہو گئے ہیں۔ اس دورے کا بنیادی مقصد عالمی مالیاتی اداروں اور ترقیاتی شراکت داروں کے ساتھ پاکستان کے معاشی روابط کو مزید مستحکم بنانا، ملکی معاشی منظرنامے اور ساختی اصلاحات پر پیش رفت سے آگاہ کرنا اور سرمایہ کاری کے فروغ کے لیے نئے مواقع تلاش کرنا ہے۔
وزارت خزانہ کے مطابق، وزیر خزانہ اپنے دورے کے دوران 60 سے زائد اعلیٰ سطحی ملاقاتیں کریں گے۔ ان ملاقاتوں میں بین الاقوامی سرمایہ کاروں، عالمی بینکوں کے نمائندوں، کریڈٹ ریٹنگ ایجنسیوں اور مختلف ممالک کے حکام کے ساتھ تبادلہ خیال کیا جائے گا۔
دورے کے دوران محمد اورنگزیب آئی ایم ایف اور عالمی بینک کی قیادت سے ملاقاتوں میں پاکستان کی معاشی صورتحال، جاری اصلاحاتی اقدامات اور پائیدار اقتصادی ترقی کے امکانات پر گفتگو کریں گے۔ وہ عالمی سرمایہ کاروں کے سامنے پاکستان میں سرمایہ کاری، برآمدات کے فروغ اور نجی شعبے کی ترقی کے امکانات بھی اجاگر کریں گے۔
وزیر خزانہ کی سعودی عرب، چین، ترکیہ، ایران، برطانیہ اور تھائی لینڈ کے ہم منصبوں سے ملاقاتیں متوقع ہیں۔ ان ملاقاتوں کا مقصد دوطرفہ اقتصادی تعاون بڑھانا، سرمایہ کاری کے مواقع تلاش کرنا اور پاکستان کے اصلاحاتی ایجنڈے پر تبادلہ خیال کرنا ہے۔
امریکی محکمہ خزانہ کے حکام کے ساتھ بھی ملاقات طے ہے جس میں اقتصادی تعاون اور اصلاحاتی ترجیحات زیر بحث آئیں گی۔
کریڈٹ ریٹنگ ایجنسیوں فچ ریٹنگز، موڈیز اور ایس اینڈ پی گلوبل کے نمائندوں سے بھی وزیر خزانہ کی ملاقاتیں شیڈول ہیں۔ ان اجلاسوں میں پاکستان کی معاشی پیش رفت، اصلاحاتی اقدامات اور مالیاتی استحکام کے لیے اٹھائے گئے اقدامات سے آگاہ کیا جائے گا۔
محمد اورنگزیب جے پی مورگن، سٹی، ڈوئچے بینک اور سٹینڈرڈ چارٹرڈ سمیت معروف عالمی مالیاتی اداروں کے نمائندوں سے بھی ملیں گے۔ ان ملاقاتوں کا مقصد عالمی سرمایہ منڈیوں تک پاکستان کی رسائی کے امکانات اجاگر کرنا، بین الاقوامی مالیاتی تعاون کو فروغ دینا اور ملک میں سرمایہ کاری کے لیے سازگار مواقع کی نشاندہی کرنا ہے۔
وزیر خزانہ علی بابا انٹرنیشنل ڈیجیٹل کامرس کے نمائندوں سے بھی ملاقات کریں گے جس میں پاکستان کی ڈیجیٹل معیشت، ای کامرس کے فروغ، ڈیجیٹل تجارت اور سرمایہ کاری کے امکانات پر گفتگو ہوگی۔
وزیر خزانہ جی-24 اور وی 20 سمیت اہم عالمی اقتصادی فورمز میں بھی شرکت کریں گے۔ ان فورمز میں وہ موسمیاتی اقدامات، روزگار کے مواقع اور پائیدار ترقی سے متعلق عالمی اجلاسوں میں پاکستان کا مؤقف پیش کریں گے اور معاشی استحکام سے پائیدار ترقی کی جانب ملک کی پیش رفت کو اجاگر کریں گے۔
دورے کے دوران محمد اورنگزیب عالمی میڈیا اداروں کے نمائندوں سے بھی ملاقاتیں کریں گے جن میں رائٹرز، بلومبرگ، نکی ایشیا اور وال سٹریٹ جرنل شامل ہیں۔ ان ملاقاتوں میں پاکستان کے معاشی منظرنامے، حکومتی اصلاحاتی ترجیحات اور سرمایہ کاری کے امکانات کے حوالے سے عالمی میڈیا کو آگاہ کیا جائے گا۔
وزارت خزانہ کا کہنا ہے کہ وزیر خزانہ کا یہ دورہ پاکستان کے عالمی مالیاتی اداروں، ترقیاتی شراکت داروں اور بین الاقوامی سرمایہ کاروں کے ساتھ روابط مزید مضبوط بنانے کی کوششوں کا حصہ ہے۔ دورے کے دوران خصوصی توجہ سرمایہ کاری کے فروغ، برآمدات میں اضافے، روزگار کے مواقع پیدا کرنے اور بین الاقوامی مالیاتی تعاون کو وسعت دینے پر مرکوز رہے گی۔
اپنی رائے دیں