وفاقی وزیر داخلہ سید محسن رضا نقوی سے روس کے وزیر داخلہ ولادیمیر کولوکولتسیف نے اسلام آباد میں ملاقات کی، جس میں باہمی دلچسپی کے امور اور سیکیورٹی تعاون کو فروغ دینے پر تفصیلی بات چیت کی گئی۔
ملاقات کے دوران دونوں رہنماؤں نے اس بات پر اتفاق کیا کہ پاکستان اور روس کے درمیان دوستانہ اور تعمیری تعلقات خطے میں امن و استحکام کے لیے انتہائی اہمیت کے حامل ہیں۔
روسی وزیر داخلہ نے اس موقع پر کہا کہ قانون نافذ کرنے والے اداروں کے درمیان دوطرفہ تعاون دونوں ممالک کے مضبوط اور تعمیری تعلقات کی بنیاد ہے، جسے مزید مستحکم کرنے کی ضرورت ہے۔
مذاکرات میں بین الاقوامی منظم جرائم، دہشت گردی، انتہا پسندی، اسلحے اور منشیات کی غیر قانونی اسمگلنگ کے خاتمے کے لیے مشترکہ کوششوں پر توجہ مرکوز کی گئی۔
سائبر کرائم کے بڑھتے ہوئے خطرات بھی ملاقات کا اہم حصہ رہے۔ دونوں وزراء نے ٹیلی فون فراڈ، فشنگ اور کرپٹو کرنسی کے ذریعے کی جانے والی پونزی اسکیموں جیسے جرائم سے نمٹنے کے لیے حکمت عملی پر تبادلہ خیال کیا۔
ولادیمیر کولوکولتسیف نے جرائم سے متعلق معلومات کے بروقت تبادلے کی اہمیت پر زور دیتے ہوئے کہا کہ انٹرپول کے ذریعے تعاون کو مزید مضبوط بنانے کی ضرورت ہے۔
روسی وزیر داخلہ نے سائبر کرائم کی تحقیقات میں مہارت کے تبادلے اور تکنیکی معاونت فراہم کرنے کی اہمیت پر زور دیا، جس کا مقصد پاکستانی قانون نافذ کرنے والے اداروں کی استعداد کار میں اضافہ کرنا ہے۔
ملاقات میں پیشہ ورانہ تربیت کے شعبے میں تعاون کو وسعت دینے پر بھی اتفاق کیا گیا۔ روسی وزیر داخلہ نے پاکستانی ماہرین کے لیے تربیتی اور پیشہ ورانہ ترقی کے پروگراموں کو وسعت دینے کے لیے روس کی آمادگی کا اظہار کیا۔
روسی وزیر داخلہ نے اس بات پر زور دیا کہ روس، پاکستان کو بین الاقوامی پلیٹ فارمز بالخصوص اقوام متحدہ پر ایک اہم اور قابل اعتماد شراکت دار سمجھتا ہے۔
دونوں ممالک نے اس عزم کا اظہار کیا کہ قانون نافذ کرنے والے اداروں کے درمیان معلومات کا تبادلہ سیاسی مقاصد سے بالاتر ہو کر صرف امن و امان کے قیام کے لیے استعمال کیا جائے گا۔
وفاقی وزیر داخلہ محسن نقوی نے روسی ہم منصب کا شکریہ ادا کیا اور کہا کہ پاکستان روس کے ساتھ اپنے سیکیورٹی تعلقات کو انتہائی قدر کی نگاہ سے دیکھتا ہے۔
ملاقات کے اختتام پر روسی وزیر داخلہ نے پاکستان کے قانون نافذ کرنے والے اداروں کے ساتھ تعاون کو مزید مضبوط بنانے کے روس کے عزم کا اعادہ کیا۔
اپنی رائے دیں