اینڈرائیڈ اسمارٹ فونز میں ایک سنگین سیکیورٹی خامی سامنے آئی ہے جس کے ذریعے حملہ آور صارف کی مداخلت کے بغیر ڈیوائس کو ناکارہ بنا سکتے ہیں۔ اس سیکیورٹی نقص کو CVE-2026-58882 کا نام دیا گیا ہے، جبکہ سیکیورٹی محقق مارک بلاسزک نے اسے 'ایس ایم ایس آف ڈیتھ' قرار دیا ہے۔
محقق کے مطابق یہ خصوصی ٹیکسٹ میسج صارف کے ان باکس میں ظاہر ہوئے بغیر فون کے کال سسٹم کو متاثر کرتا ہے، جس سے جاری کالز منقطع ہو سکتی ہیں، حتیٰ کہ ایمرجنسی سروسز کی کالز بھی متاثر ہو سکتی ہیں۔ تقریباً 20 ایسے پیغامات فون کو مسلسل کریش یا بوٹ لوپ میں پھنسانے کا سبب بن سکتے ہیں۔
یہ سیکیورٹی خامی اینڈرائیڈ 12 سے موجود کوڈ میں دیکھی گئی ہے، جس سے گوگل پکسل اور سام سنگ گلیکسی سمیت متعدد اینڈرائیڈ ڈیوائسز متاثر ہو سکتی ہیں۔
گوگل کے ریکارڈز کے مطابق اس مسئلے کا حل 15 جون کو تیار کر لیا گیا تھا اور جولائی میں سیکیورٹی پری ویوز کے ذریعے فراہم کیا گیا تھا۔ اینڈرائیڈ 14 سے 17 تک کے لیے اکتوبر کی سیکیورٹی اپ ڈیٹس میں بھی یہ حل شامل کیا جا چکا ہے۔
سیکیورٹی ماہرین نے صارفین کو مشورہ دیا ہے کہ وہ اپنے اسمارٹ فونز میں تازہ ترین دستیاب سیکیورٹی اپ ڈیٹس فوری طور پر انسٹال کریں تاکہ کسی بھی ممکنہ خطرے سے محفوظ رہا جا سکے۔
اپنی رائے دیں