وزیراعظم محمد شہباز شریف نے وزیراعظم یوتھ بزنس لون اور وزیراعظم یوتھ ایگریکلچر لون اسکیموں کے تحت انفرادی قرضوں کی حد 7.5 ملین روپے سے بڑھا کر 25 ملین روپے کر دی ہے۔ اس بات کا فیصلہ نوجوانوں کو آسان اقساط پر قرضوں کی فراہمی اور ان اسکیموں پر عملدرآمد کا جائزہ لینے کے لیے منعقدہ ایک اجلاس کے دوران کیا گیا۔
اجلاس میں بریفنگ دی گئی کہ مالی سال 2026-27 کے دوران ان اسکیموں کے تحت نوجوانوں کو قرضے فراہم کرنے کے لیے 292 ارب روپے کی رقم رکھی گئی ہے۔ وزیراعظم نے ہدایات جاری کیں کہ خواتین کو معاشی طور پر خودمختار بنانے اور کاروباری سرگرمیوں میں ان کی حوصلہ افزائی کے لیے کل قرضوں کا 30 فیصد حصہ خواتین کے لیے مختص کیا جائے۔
وزیراعظم نے درخواست گزاروں کی کم از کم عمر 21 سال سے کم کرکے 18 سال کرنے کی ہدایت بھی کی تاکہ کم عمر میں ہی نوجوان اپنے کاروبار اور زرعی سرگرمیوں کا آغاز کر سکیں۔ انہوں نے نوجوانوں کو مالی امداد فراہم کرنے کے موثر انتظامات کرنے پر وزیرِ خزانہ محمد اورنگزیب اور ان کی ٹیم کی کارکردگی کو سراہا۔
اجلاس کو بتایا گیا کہ جنوری 2023 سے اب تک 581,341 نوجوان قرضے حاصل کر چکے ہیں جو کہ گزشتہ دس سال کے مقابلے میں دس گنا زیادہ تعداد ہے۔ اس مدت کے دوران مجموعی طور پر 313.9 ارب روپے کے قرضے تقسیم کیے جا چکے ہیں۔
موجودہ مالی سال کے دوران اندازاً 266,700 نوجوانوں کو 292 ارب روپے کے قرضے ملنے کی توقع ہے۔ وزیراعظم نے کہا کہ نوجوان پاکستان کا قیمتی اثاثہ ہیں اور حکومت ان کی صلاحیتوں کو بروئے کار لاتے ہوئے انہیں باوقار اور پیداواری روزگار کے مواقع فراہم کرنے کے لیے پرعزم ہے۔
اجلاس میں سمال اینڈ میڈیم انٹرپرائزز ڈویلپمنٹ اتھارٹی کو ہدایت کی گئی کہ وہ اسکیموں کے تحت نوجوانوں کو کاروبار کے آغاز کے لیے رہنمائی، کاروباری مشاورت اور تکنیکی مدد فراہم کرے۔ متعلقہ حکام کو یہ بھی حکم دیا گیا کہ وہ ملک بھر میں ایک آگاہی مہم چلائیں تاکہ زیادہ سے زیادہ نوجوان ان حکومتی سہولیات سے مستفید ہو سکیں۔
اس اجلاس میں وزیرِ خزانہ محمد اورنگزیب، وزیراعظم کے معاونِ خصوصی برائے امورِ نوجوانان رانا مشہود احمد خان اور وزیراعظم کے معاونِ خصوصی برائے سیاسی امور طلحہ برقی نے بھی شرکت کی۔
اپنی رائے دیں