وفاقی وزیر برائے پیٹرولیم علی پرویز ملک نے کہا ہے کہ حکومت توانائی کی قیمتوں کے حوالے سے غیر معمولی حالات سے نمٹنے کے لیے پرعزم ہے اور ایل پی جی کی قیمتوں میں پیٹرول کی طرح مکمل شفافیت لائی جائے گی۔
ایک بیان میں وزیر پیٹرولیم نے واضح کیا کہ ملک میں ایل پی جی کی یومیہ کھپت ساڑھے چھ سے سات ہزار ٹن ہے، جس میں سے دو سے ڈھائی ہزار ٹن مقامی پیداوار ہے جبکہ باقی مقدار بیرون ملک سے درآمد کی جاتی ہے۔
علی پرویز ملک نے کہا کہ ایل پی جی کی قیمت 400 سے 425 روپے فی کلو کے درمیان ہونی چاہیے، تاہم کچھ عناصر اسٹے آرڈر لے کر عوام کا خون چوس رہے ہیں جن کے خلاف سخت کارروائی کی تیاری مکمل کر لی گئی ہے۔
انہوں نے بتایا کہ مارکیٹ اور مقامی قیمتوں کے درمیان 30 ارب روپے کا فرق ہے اور حکومت ان عناصر کے خلاف کارروائی کے لیے پرعزم ہے جن کے پاس لائسنس موجود ہیں لیکن وہ ناجائز منافع خوری میں ملوث ہیں۔
وزیر پیٹرولیم کے مطابق وزیراعظم نے اٹارنی جنرل کو ہدایت کی ہے کہ ایل پی جی کی قیمتوں سے متعلق زیر التواء عدالتی کیسز میں اسٹے آرڈر ختم کرائے جائیں تاکہ عوام کو ریلیف مل سکے اور قیمتوں میں بہتری آئے۔
انہوں نے قطر کے ساتھ گیس کی فراہمی کے معاہدے کا ذکر کرتے ہوئے کہا کہ ہرمز کی صورتحال کے باوجود قطر نے ہمیں 12 سے 13 ڈالر پر گیس فراہم کی ہے۔
سردیوں کے موسم کے حوالے سے انہوں نے بتایا کہ نومبر سے فروری تک گیس کی فراہمی کے لیے خصوصی حکمت عملی بنائی گئی ہے تاکہ عوام کو کھانا پکانے کے اوقات میں گیس کی فراہمی کو یقینی بنایا جا سکے۔
علی پرویز ملک نے کہا کہ پنجاب میں سردیوں کے دوران گیس کی طلب ایک ارب مکعب فٹ تک پہنچنے کا خدشہ ہے، تاہم حکومت نے فیول سبسڈی کے لیے بجٹ مختص کر رکھا ہے جس میں کافی گنجائش موجود ہے۔
انہوں نے خبردار کیا کہ ایل پی جی کی مقررہ قیمت سے زائد وصولی کرنے والوں کو کسی صورت معاف نہیں کیا جائے گا اور حکومت خود ایل پی جی درآمد کر کے سسٹم میں شامل کرے گی تاکہ سپلائی چین کو بہتر بنایا جا سکے۔
وزیر پیٹرولیم نے کہا کہ ستمبر تک متعلقہ افراد کو وارننگ دی گئی تھی اور اب بھی گزارش ہے کہ وہ جائز قیمت پر ایل پی جی فراہم کریں، بصورت دیگر قانون حرکت میں آئے گا اور ناجائز منافع خوری کا خاتمہ کیا جائے گا۔
وزیر پیٹرولیم نے امید ظاہر کی کہ آئندہ دو سے تین دنوں میں ایل پی جی کی قیمتوں میں نمایاں بہتری آنا شروع ہو جائے گی اور عوام کو ریلیف ملے گا۔
انہوں نے مزید کہا کہ اللہ تعالیٰ فیلڈ مارشل اور وزیر داخلہ کی کاوشوں میں کامیابی عطا کرے کیونکہ وہیں سے ہی توانائی کے مسائل کا مستقل اور پائیدار حل نکلے گا۔
اپنی رائے دیں