مکہ معاہدہ سعودی عرب اور ترکیہ کے ساتھ شراکت داری کی علامت ہے، اسحاق ڈار

نائب وزیراعظم اور وزیر خارجہ سینیٹر اسحاق ڈار نے واضح کیا ہے کہ مکہ معاہدہ سعودی عرب اور ترکیہ کے ساتھ پاکستان کی گہری شراکت داری کی ایک علامت ہے اور یہ کسی بھی ملک کے خلاف نہیں ہے۔ اسلام آباد میں 'مارگلہ ڈائیلاگ 2026' کی افتتاحی تقریب سے خطاب کرتے ہوئے انہوں نے کہا کہ پاکستان خطے میں ایک پرامن، مستحکم اور معاشی طور پر مربوط ماحول کا خواہاں ہے، جس کے لیے تمام متعلقہ ممالک کے ساتھ سفارتی روابط کو اہمیت دی جا رہی ہے۔

اس تقریب کا انعقاد اسلام آباد پالیسی ریسرچ انسٹیٹیوٹ (آئی پی آر آئی) کے زیر اہتمام کیا گیا، جس میں مختلف ممالک کے سفیروں اور اہم شخصیات نے شرکت کی۔ اس سال کے ڈائیلاگ کا مرکزی موضوع 'بدلتا ہوا عالمی نظام اور اسٹریٹجک غیر یقینی صورتحال سے نمٹنے کے طریقہ کار' رکھا گیا ہے۔

اسحاق ڈار نے اپنے خطاب میں کہا کہ عالمی قوانین کا غیر منصفانہ اطلاق دنیا میں تفریق پیدا کر رہا ہے، اس لیے اقوام متحدہ سمیت دیگر عالمی اداروں کو اپنا کردار مزید مؤثر بنانے کی ضرورت ہے۔ انہوں نے خبردار کیا کہ بین الاقوامی سلامتی کا نظام اس وقت شدید دباؤ کا شکار ہے اور ابھرتی ہوئی ٹیکنالوجیز، بشمول بائیو ٹیکنالوجی، ریاستوں کے بحرانوں سے نمٹنے کے روایتی طریقوں کو تیزی سے تبدیل کر رہی ہیں۔

نائب وزیراعظم نے پاکستان کی خارجہ پالیسی کے اہم ستونوں کا ذکر کرتے ہوئے کہا کہ چین کے ساتھ اسٹریٹجک شراکت داری پاکستان کی اولین ترجیح ہے، جبکہ امریکا، سعودی عرب، ترکیہ، جاپان، مصر، متحدہ عرب امارات اور ملائیشیا کے ساتھ تعلقات بھی انتہائی اہمیت کے حامل ہیں۔ انہوں نے اس بات پر زور دیا کہ سعودی عرب اور ترکیہ کے ساتھ مجوزہ دفاعی تعاون علاقائی امن و استحکام کے لیے پاکستان کے عزم کا منہ بولتا ثبوت ہے۔

اسحاق ڈار نے کہا کہ پاکستان جنوبی ایشیا میں قیامِ امن کے لیے جموں و کشمیر کے تنازعے کو اقوام متحدہ کی قراردادوں کے مطابق حل کرنے پر زور دیتا ہے۔ انہوں نے یہ بھی کہا کہ پاکستان پانی کو ہتھیار بنانے کی مخالفت کرتا ہے اور تمام علاقائی شراکت داروں کے ساتھ بات چیت کے چینلز کھلے رکھنے کا خواہاں ہے۔

معاشی سفارت کاری کو اپنی اہم ذمہ داری قرار دیتے ہوئے انہوں نے کہا کہ پاکستان میں سرمایہ کاری کے فروغ کے لیے مضبوط اداروں اور ہنرمند افرادی قوت کی ضرورت ہے۔ انہوں نے مطالبہ کیا کہ ترقی پذیر ممالک کو عالمی معاشی نظام میں مساوی مواقع ملنے چاہئیں تاکہ وہ جدید ٹیکنالوجی تک رسائی حاصل کر سکیں اور اپنے عوام کا معیار زندگی بہتر بنا سکیں۔

تقریب سے خطاب کرتے ہوئے آئی پی آر آئی کے صدر لیفٹیننٹ جنرل (ر) ماجد احسان نے کہا کہ مارگلہ ڈائیلاگ اب پالیسی سازوں کے لیے ایک اہم پلیٹ فارم بن چکا ہے۔ انہوں نے غزہ، افغانستان، یوکرین اور افریقہ میں جاری تنازعات کو بین الاقوامی نظام کی ناکامی قرار دیتے ہوئے کہا کہ دنیا کو ان چیلنجز سے نمٹنے کے لیے نئے اور پائیدار نظام کی ضرورت ہے۔

اسحاق ڈار نے یاد دلایا کہ پاکستان نے 5 نومبر کو سلامتی کونسل میں تنازعات کے دوران سفارت کاری اور بات چیت سے متعلق ایک قرارداد منظور کروائی ہے، جو پاکستان کی پرامن خارجہ پالیسی کا عکاس ہے۔ انہوں نے کہا کہ امریکا اور ایران کے درمیان اسلام آباد میں ہونے والے مذاکرات بھی اسی پرامن سفارتی کوششوں کا حصہ تھے۔

آخر میں انہوں نے کہا کہ پاکستان اپنی دفاعی اور تکنیکی صلاحیتوں میں اضافے کے ساتھ ساتھ معاشی ترقی کے لیے سازگار ماحول پیدا کرنے پر توجہ مرکوز رکھے ہوئے ہے۔ حکومت کا مقصد کاروبار کے فروغ اور روزگار کے مواقع پیدا کر کے ملک کو معاشی طور پر مستحکم بنانا ہے۔