لاہور: اداکار معمر رانا کی اہلیہ مہناز نے لاہور کی فیملی کورٹ سے خلع لے لیا، عدالت نے مہناز کے حق میں خلع کی ڈگری جاری کر دی۔ درخواست گزار مہناز نے مؤقف اختیار کیا کہ ان کی شادی 24 اکتوبر 1998 کو معمر رانا سے ہوئی تھی اور شادی کو 28 برس گزر چکے ہیں، ان کی دو بیٹیاں ہیں۔
درخواست میں کہا گیا کہ معمر رانا شراب پی کر ان پر تشدد کرتے اور گالیاں دیتے ہیں، وہ بیٹیوں کے سامنے بھی گالم گلوچ کرتے ہیں۔ ان کے رویے کے باعث بیٹیوں کو بھی مبینہ طور پر ذہنی اذیت اور بدسلوکی کا سامنا کرنا پڑا۔
مہناز نے مزید مؤقف اختیار کیا کہ معمر رانا گھر کے اخراجات برداشت نہیں کر رہے۔ اہل خانہ نے ان کے رویے میں بہتری لانے کی متعدد کوششیں کیں، تاہم انھوں نے انکار کر دیا۔
درخواست گزار نے عدالت سے استدعا کی تھی کہ وہ معمر رانا کے ساتھ مزید نہیں رہ سکتیں، اس لیے انھیں خلع کی ڈگری جاری کی جائے۔ عدالت نے مہناز کے حق میں خلع کی ڈگری جاری کر دی۔ مہناز معمر رانا نے بیرسٹر خدیجہ صدیقی کے توسط سے خلع کی ڈگری حاصل کی اور انہوں نے معمر رانا کے ساتھ مصالحت کرنے سے بھی انکار کر دیا ہے۔
اپنی رائے دیں