محکمہ موسمیات کی جانب سے جاری کردہ تازہ ترین رپورٹ کے مطابق پاکستان کے بیشتر علاقوں میں موسم خشک رہنے کی توقع ہے۔ تاہم ملک کے بالائی حصوں میں مطلع جزوی طور پر ابر آلود رہے گا جس سے موسم میں تبدیلی متوقع ہے۔
رپورٹ کے مطابق گلگت بلتستان، کشمیر اور ان سے ملحقہ علاقوں میں چند مقامات پر تیز ہواؤں اور گرج چمک کے ساتھ بارش کا امکان ظاہر کیا گیا ہے۔ ان علاقوں میں صبح اور رات کے اوقات میں موسم سرد رہنے کی پیش گوئی کی گئی ہے۔
اسلام آباد اور گردونواح میں موسم خشک رہے گا۔ خیبرپختونخوا کے بیشتر اضلاع میں بھی موسم خشک رہنے کی توقع ہے، تاہم بالائی اضلاع میں مطلع ابر آلود رہنے کے علاوہ صبح اور رات کے وقت خنکی میں اضافے کا امکان ہے۔
پنجاب کے بیشتر اضلاع میں موسم خشک رہے گا۔ مری اور گلیات کے علاقوں میں صبح کے اوقات میں مطلع جزوی طور پر ابر آلود رہنے کی توقع ہے۔ سندھ کے بیشتر اضلاع میں موسم خشک جبکہ دن کے دوران گرم رہنے کا امکان ہے۔
بلوچستان کے بیشتر اضلاع میں بھی موسم خشک رہے گا۔ محکمہ موسمیات کے مطابق شام اور رات کے دوران گلگت بلتستان کے چند مقامات پر تیز ہواؤں اور گرج چمک کے ساتھ ہلکی بارش ہو سکتی ہے جس سے درجہ حرارت میں مزید کمی آئے گی۔
گزشتہ 24 گھنٹوں کے دوران ملک کے مختلف حصوں میں بارش کا سلسلہ جاری رہا۔ پنجاب، اسلام آباد، خیبر پختونخوا، کشمیر اور گلگت بلتستان میں تیز ہواؤں اور گرج چمک کے ساتھ کہیں ہلکی اور کہیں موسلا دھار بارش ریکارڈ کی گئی۔
بارش کے اعداد و شمار کے مطابق پنجاب میں نور پور تھل میں سب سے زیادہ 48 ملی میٹر بارش ہوئی۔ اسلام آباد کے مختلف علاقوں میں بھی اچھی بارش ریکارڈ کی گئی، جن میں سیدپور میں 41 اور زیرو پوائنٹ میں 25 ملی میٹر بارش شامل ہے۔
سرگودھا سٹی میں 32 ملی میٹر، لاہور سٹی میں 19 ملی میٹر اور راولپنڈی کے مختلف مقامات پر بھی بارش ہوئی۔ مری میں 19 ملی میٹر، فیصل آباد میں 18 ملی میٹر اور اٹک میں 11 ملی میٹر بارش ریکارڈ کی گئی۔
خیبر پختونخوا کے اضلاع میں ڈیرہ اسماعیل خان میں 23 ملی میٹر، دیر میں 14 ملی میٹر اور کاکول میں 13 ملی میٹر بارش ہوئی۔ پشاور اور بالاکوٹ سمیت دیگر بالائی علاقوں میں بھی بارش کا سلسلہ دیکھا گیا۔
کشمیر کے علاقوں گڑھی دوپٹہ میں 25 ملی میٹر اور کوٹلی میں 15 ملی میٹر بارش ہوئی۔ گلگت بلتستان میں گوپس میں 8 ملی میٹر اور استور میں 6 ملی میٹر بارش ریکارڈ کی گئی، جبکہ دیگر مقامات پر بھی ہلکی بارش ہوئی۔
ملک کے گرم ترین علاقوں کی بات کی جائے تو مٹھی میں درجہ حرارت 42 ڈگری سینٹی گریڈ ریکارڈ کیا گیا۔ تربت میں 41 اور شہید بینظیر آباد میں درجہ حرارت 40 ڈگری سینٹی گریڈ تک پہنچ گیا، جہاں موسم بدستور گرم ہے۔
ماہرین موسمیات کا کہنا ہے کہ موسم سرما کی آمد کے ساتھ ہی بالائی علاقوں میں درجہ حرارت میں بتدریج کمی آ رہی ہے۔ شہریوں کو ہدایت کی گئی ہے کہ وہ موسم کی تبدیلی کے پیش نظر احتیاطی تدابیر اختیار کریں۔
محکمہ موسمیات کی جانب سے جاری کردہ یہ پیش گوئی ملک بھر کے موسم کی مجموعی صورتحال کو واضح کرتی ہے۔ عوام کو مشورہ دیا گیا ہے کہ وہ کسی بھی سفر سے قبل موسم کی تازہ ترین صورتحال سے آگاہ رہیں۔
اپنی رائے دیں