کنڑ فلم انڈسٹری کے نامور اداکار یش کا تعلق ایک ایسے عام گھرانے سے تھا جہاں شوبز سے دور دور تک کوئی واسطہ نہیں تھا۔ ان کے والد بنگلورو میں میونسپل بس سروس کے ایک ڈرائیور تھے جو روزانہ کی بنیاد پر صرف 14 روپے کمایا کرتے تھے۔ گھر کے تنگدست مالی حالات کے باعث یش کو اپنی ابتدائی تعلیم ادھوری چھوڑنا پڑی اور گھر کی کفالت میں ہاتھ بٹانے کے لیے وہ کریانے کی دکان پر بھی کام کیا کرتے تھے۔
ان کے والدین کی خواہش تھی کہ وہ پڑھ لکھ کر کوئی سرکاری افسر بنیں لیکن نوعمری سے ہی یش کے دل میں اداکاری اور سٹیج پرفارمنس کا گہرا شوق پل رہا تھا۔ اسکول اور کالج کے دنوں میں وہ مختلف ڈراموں اور رقص کے مقابلوں میں بڑھ چڑھ کر حصہ لیتے تھے جہاں ناظرین کی داد اور تالیاں ان کے اس خواب کو مزید پختہ کرتی گئیں۔
وقت کے ساتھ یہی شوق ایک پکا ارادہ بن گیا اور انھوں نے فیصلہ کیا کہ وہ اپنی زندگی فلمی اداکاری کے لیے وقف کر دیں۔ گھر والوں کو ان کا یہ فیصلہ پسند نہیں آیا لیکن والد نے واضح کر دیا کہ اگر وہ اپنی مرضی کی دنیا میں قسمت آزمانا چاہتے ہیں تو جا سکتے ہیں مگر ناکامی کی صورت میں واپس آ کر وہی کرنا ہوگا جو گھر والے کہیں گے۔
فلمی دنیا میں قسمت آزمانے کی غرض سے جب یش نے بنگلورو کا رخ کیا تو ان کی جیب میں محض 300 روپے تھے۔ ایک بڑے اور اجنبی شہر میں قدم رکھتے ہی وہ خوف زدہ تو ہوئے مگر اپنے عزم پر قائم رہے کیونکہ وہ جانتے تھے کہ اگر وہ ہم ہار کر واپس لوٹے تو والدین انہیں دوبارہ کبھی باہر جانے کی اجازت نہیں دیں گے۔
ان کی زندگی میں اصل تبدیلی اس وقت آئی جب ان کی ملاقات ننجنڈا نامی دوست سے ہوئی جنھوں نے یش کو باقاعدہ تھیٹر کی دنیا سے متعارف کروایا۔ دیومالائی کرداروں کے روایتی ناٹکوں سے نکل کر وہ بینکا تھیٹر گروپ کا حصہ بنے جہاں سماجی موضوعات پر مبنی ڈراموں نے ان کی اداکاری کی صلاحیتوں کو نکھارنے میں اہم کردار ادا کیا۔
تھیٹر کے تجربے نے ان کی شخصیت کی بھرپور تشکیل کی اور انھیں فنِ اداکاری کی باریکیوں سے آگاہ کیا۔ یش اس بات کا اعتراف کرتے ہیں کہ تھیٹر نے ہی ایک عام بس ڈرائیور کے بیٹے کو ایک پراعتماد اداکار بنایا اور انہیں زندگی کو نئے زاویے سے دیکھنے کا شعور عطا کیا۔
ٹی وی سکرین پر ان کا پہلا بڑا تعارف مقبول ڈرامے نندا گوکلا کے ذریعے ہوا جو 2004 سے 2007 کے درمیان نشر ہوا۔ اس سیریل میں ان کی اور اداکارہ رادھیکا پنڈت کی جوڑی کو ناظرین کی طرف سے بے پناہ پذیرائی ملی اور یہی جوڑی بعد میں ان کے فلمی کریئر کی مضبوط بنیاد بنی۔
2007 میں انہوں نے فلم جمباڈا ہدوگی کے ذریعے بڑے پردے پر قدم رکھا لیکن انھیں اصل شناخت 2008 میں ریلیز ہونے والی فلم موگینا مناسو سے ملی۔ دلچسپ بات یہ ہے کہ اس فلم میں یہ کردار کسی اور اداکار کو ملنا تھا جو موٹر سائیکل حادثے کے باعث زخمی ہو گیا اور یوں یہ موقع یش کے ہاتھ آ گیا۔
اس فلم میں شاندار اداکاری پر انہیں بہترین معاون اداکار کا فلم فیئر ایوارڈ ملا جس نے ان کے لیے فلمی راستے ہموار کر دیے۔ اس کے بعد آنے والی فلموں جیسے کہ گوگلی اور مسٹر اینڈ مسز راماچاری نے انہیں نوجوانوں بالخصوص کالج کے طلبا میں سپر سٹار کی حیثیت دلوا دی۔
ان کے کریئر کا سب سے بڑا موڑ کے جی ایف نامی فلم بنی جس کی ملک گیر کامیابی نے انہیں سرحدوں سے باہر بھی شہرت کی بلندیوں پر پہنچا دیا۔ اس فلم کے بعد بالخصوص ہندی بولنے والے علاقوں میں ان کے مداحوں کی تعداد میں زبردست اضافہ ہوا اور وہ ایک قومی سطح کے ستارے بن گئے۔
موجودہ دور میں وہ انڈین سنیما کے سب سے بڑے اور مہنگے پراجیکٹس میں سے ایک میں اہم کردار ادا کرنے جا رہے ہیں۔ ہدایت کار نتیش تیواری کی آنے والی بڑی فلم میں وہ ایک انتہائی پیچیدہ اور تاریخی کردار نبھاتے دکھائی دیں گے جس کا مداحوں کو بے صبری سے انتظار ہے۔
اس آنے والی فلم رامائن میں وہ راون کا اہم کردار نبھا رہے ہیں اور اس کے شریک پروڈیوسرز میں بھی شامل ہیں۔ ان کا ماننا ہے کہ یہ کردار اس لیے بھی بہت زیادہ چیلنجنگ ہے کیونکہ ہر شخص اس سے واقف ہے اور لوگ روایتی طور پر اس سے سخت نفرت کرتے ہیں۔
فلمی حلقوں اور ناقدین کے مطابق یش کی یہ کامیابی محض اتفاق نہیں بلکہ ان کی کڑی محنت، مسلسل جدوجہد اور تھیٹر کے دنوں کی ریاضت کا ثمر ہے۔ ایک عام بس ڈرائیور کے بیٹے سے لے کر ملک کے صف اول کے سپر سٹار بننے تک کا یہ سفر ہزاروں نوآموز فنکاروں کے لیے ایک بڑی مثال ہے۔
اپنی رائے دیں