وزیراعظم محمد شہباز شریف نے وزارتِ خارجہ کو ہدایت کی ہے کہ وہ بارش کے پانی میں ڈوبنے والے غزہ کے فلسطینیوں کے لیے فوری طور پر انسانی امداد میں اضافہ کرے۔
پیر کے روز جاری کردہ اپنے ایک بیان میں وزیراعظم نے غزہ کے عوام کو بنیادی انسانی امداد کی فراہمی روکنے کے جاری اسرائیلی اقدامات پر گہری تشویش کا اظہار کیا۔
انہوں نے سوشل میڈیا پر اپنے پیغام میں لکھا کہ خیموں کے پانی میں ڈوبنے اور شدید مصائب کا شکار بچوں اور خاندانوں کی دل دہلا دینے والی تصاویر سامنے آرہی ہیں۔
وزیراعظم کے مطابق غزہ کے بہادر فلسطینی عوام اس وقت کڑے امتحان سے گزر رہے ہیں اور انہیں اس کٹھن وقت میں عالمی مدد کی اشد ضرورت ہے۔
انہوں نے متعلقہ حکام کو ہدایت کی کہ امدادی سامان کی ترسیل کے عمل کو تیز کیا جائے تاکہ بارش اور طوفان سے متاثرہ افراد تک بروقت رسائی ممکن ہو سکے۔
حکومتِ پاکستان کی جانب سے اس سے قبل بھی غزہ کے متاثرین کے لیے متعدد امدادی کھیپیں روانہ کی جا چکی ہیں جن میں خوراک اور طبی سامان شامل ہے۔
بین الاقوامی سطح پر بھی غزہ کے اندر انسانی بحران پر مسلسل تشویش ظاہر کی جا رہی ہے جہاں بنیادی ڈھانچہ تباہ ہو چکا ہے۔
اپنی رائے دیں