پاکستان نے 23ویں ایشین ٹیم سکواش چیمپئن شپ 2026ء کا فائنل مقابلہ جیت کر ایشین چیمپئن بننے کا اعزاز حاصل کر لیا ہے۔
اسلام آباد کے مصحف سکواش کمپلیکس میں کھیلے گئے فائنل میں قومی مینز سکواش ٹیم نے جنوبی کوریا کو 0-2 سے شکست دے کر گولڈ میڈل اپنے نام کیا۔
فائنل کے پہلے میچ میں پاکستان کے سکواش کھلاڑی نور زمان نے شاندار کھیل کا مظاہرہ کرتے ہوئے جنوبی کوریا کے جیونگ من ریو کو سٹریٹ سیٹس میں شکست دی۔
نور زمان نے اپنے مقابلے میں حریف کھلاڑی کے خلاف 5-11، 7-11 اور 11-13 کے سکور سے کامیابی حاصل کر کے پاکستان کو پہلی برتری دلائی۔
دوسرے میچ میں قومی کھلاڑی محمد عاصم خان نے اپنے حریف سیوجن اوہ کو ایک طرفہ مقابلے کے بعد 6-11، 5-11 اور 4-11 سے ہرا کر پاکستان کی فتح کی توثیق کر دی۔
وفاقی وزیر برائے بین الصوبائی رابطہ رانا ثناء اللہ نے قومی مینز سکواش ٹیم کو ایشین چیمپئن شپ میں گولڈ میڈل جیتنے پر دلی مبارکباد پیش کی ہے۔
وزیراعظم کی کوآرڈینیٹر برائے بین الصوبائی رابطہ مہرین ساجد اور سیکرٹری بین الصوبائی رابطہ محی الدین احمد وانی نے بھی قومی ٹیم کے کھلاڑیوں کی کارکردگی کو سراہا۔
حکام نے فائنل مقابلے میں نور زمان اور محمد عاصم خان کے عمدہ کھیل کی خصوصاً تعریف کی اور ان کی کارکردگی کو ملک میں سکواش کی شاندار روایات کے مطابق قرار دیا۔
ان کا کہنا تھا کہ یہ کامیابی قومی کھلاڑیوں کی غیر معمولی صلاحیتوں، پختہ عزم، نظم و ضبط اور مسلسل محنت کا نتیجہ ہے۔
حکام کے مطابق ہوم گراؤنڈ پر ایشین ٹائٹل جیتنے سے اس کامیابی کی اہمیت میں مزید اضافہ ہوا ہے جس سے بین الاقوامی سطح پر پاکستان کی صلاحیتیں ظاہر ہوئی ہیں۔
انہوں نے کھیلوں کے فروغ کے لیے باصلاحیت کھلاڑیوں کو جدید انفراسٹرکچر، معیاری تربیتی سہولیات اور عالمی مقابلوں میں شرکت کے مواقع فراہم کرنے پر زور دیا۔
پاکستان کی فتح کے موقع پر مصحف سکواش کمپلیکس میں شائقین اور کھیلوں سے وابستہ افراد کی بڑی تعداد نے بھرپور خوشی کا اظہار کیا۔
میچ دیکھنے کے لیے موجود پاکستان سپورٹس بورڈ کے ملازمین اور دیگر شائقین نے قومی ٹیم کی کامیابی پر روایتی بھنگڑا ڈالا اور رقص کیا۔
پاکستان سپورٹس بورڈ کے ڈائریکٹر جنرل یاور حسین اور ڈپٹی ڈائریکٹر جنرل شاہد اسلام نے بھی قومی مینز سکواش ٹیم، کوچز اور مینجمنٹ کو مبارکباد دی ہے۔
سپورٹس بورڈ کے حکام نے اس فتح کو ملک کے لیے باعث فخر قرار دیتے ہوئے امید ظاہر کی کہ اس سے پاکستان میں سکواش کی مزید کامیابیوں کا راستہ ہموار ہو گا۔
اختتام پذیر ہونے والی اس چیمپئن شپ کے ویمنز ایونٹ میں ہانگ کانگ چین نے ملائیشیا کو 1-2 سے شکست دے کر گولڈ میڈل حاصل کیا۔
ایشین چیمپئن شپ کے اختتام پر مینز ایونٹ میں جنوبی کوریا نے جبکہ ویمنز ایونٹ میں ملائیشیا کی ٹیم نے سلور میڈلز حاصل کیے۔
اپنی رائے دیں