ایرانی پاسداران انقلاب نے جمعرات کو ایک بیان میں دعویٰ کیا ہے کہ آبنائے ہرمز میں دو مختلف واقعات کے دوران دو آئل ٹینکرز اور ایک ٹگ بوٹ میں آگ لگ گئی۔ یہ جہاز مبینہ طور پر غیر مجاز راستوں سے گزرنے کی کوشش کر رہے تھے۔
ایرانی خبر رساں ادارے ’ارنا‘ کے مطابق، پاسداران انقلاب نے بتایا کہ بدھ کی رات ایک بڑا آئل ٹینکر آبنائے کے جنوب میں ایک غیر مجاز راستے سے گزرتے ہوئے بارودی سرنگ سے ٹکرا گیا، جس کے بعد اس میں آگ بھڑک اٹھی اور وہ رک گیا۔
ایک اور واقعے میں، ایک سپر ٹینکر آبنائے کے مشرقی حصے میں راستے سے نکلتے ہوئے آگ کی لپیٹ میں آ گیا، جبکہ اس کی مدد کے لیے جانے والی ایک ٹگ بوٹ بھی آگ لگنے سے متاثر ہوئی۔
پاسداران انقلاب نے یہ بھی دعویٰ کیا ہے کہ ان کی بحریہ کے الیکٹرانک وارفیئر یونٹ نے دو ’لوکاس‘ قسم کے طیاروں کو اپنی تحویل میں لے لیا ہے جنہیں انہوں نے ’درانداز‘ قرار دیا ہے۔
بیان میں مزید کہا گیا ہے کہ ایرانی بحریہ آبنائے ہرمز پر اپنا کنٹرول برقرار رکھے ہوئے ہے۔
پاسداران انقلاب نے امریکہ پر الزام عائد کیا کہ وہ جہازوں کو پابندیوں کی خلاف ورزی اور بارودی سرنگوں والے راستوں سے گزرنے کی ترغیب دے رہا ہے۔
ایرانی حکام کے مطابق، اس صورتحال سے ہونے والا نقصان امریکی ٹیکس دہندگان اور علاقائی اتحادیوں پر بھاری انشورنس اخراجات کا بوجھ ڈالے گا۔
پاسداران انقلاب نے خبردار کیا ہے کہ آبنائے سے گزرنے کے قوانین کی خلاف ورزی کی کوششیں واشنگٹن کے لیے مزید مالی نقصانات اور سیاسی ناکامیوں کا باعث بنیں گی۔
دوسری جانب، امریکہ نے بدھ کے روز دو افراد اور ایک ادارے پر پابندیاں عائد کر دی ہیں، جن پر ایران کو کندھے سے چلنے والے فضائی دفاعی نظام (MANPADS) حاصل کرنے میں مدد کرنے کا الزام ہے۔
امریکی محکمہ خارجہ نے ان اہداف کی نشاندہی بی لا روس میں قائم ’آر مری الائنس‘ کے سی ای او محمد علی تولیبوف، نائیجیریا میں قائم ’وینگارڈ ٹیکٹیکل سپلائی لمیٹڈ‘ اور روس میں مقیم علیشر دومولودژانوف کے طور پر کی ہے۔
امریکی حکام کا دعویٰ ہے کہ یہ نیٹ ورک جعلی دستاویزات کے ذریعے ایران کے لیے چینی ساختہ فضائی دفاعی نظام کی خریداری کی کوشش کر رہا تھا۔
محکمہ خارجہ نے اپنے بیان میں کہا کہ امریکہ ایران کی عسکری صلاحیتوں کو بڑھانے والے نیٹ ورکس کو بے نقاب کرنے کا سلسلہ جاری رکھے گا۔
اپنی رائے دیں