کراچی پورٹ کو جدید خطوط پر استوار کرنے کے لیے مختلف ترقیاتی منصوبوں پر کام کی رفتار کو تیز کر دیا گیا ہے۔
اس سلسلے میں کراچی پورٹ ٹرسٹ اور کے آئی سی ٹی کے باہمی اشتراک سے پورٹ کے آپریشنز کو بہتر بنانے کے لیے اقدامات کیے جا رہے ہیں۔
ترجمان کے پی ٹی کے مطابق کے آئی سی ٹی جدید ٹیکنالوجی اور مؤثر رابطہ کاری کے ذریعے بندرگاہ کے امور میں نمایاں بہتری لا رہا ہے۔
اسی سلسلے میں ڈرائیو تھرو این ایل سی اسکیننگ سسٹم کو فعال کر دیا گیا ہے جس کے ذریعے اب فی گھنٹہ پچیس سے تیس کنٹینرز کی اسکیننگ ممکن ہو گئی ہے۔
اس جدید نظام سے کنٹینرز کی جانچ پڑتال کے عمل میں تیزی آئی ہے اور ترسیل کے مراحل بھی آسان ہو گئے ہیں۔
کراچی پورٹ کے یارڈ آپریشنز کو نہ صرف تیز بلکہ ماحول دوست بنانے کے لیے برقی ریچ اسٹیکرز بھی متعارف کرا دیے گئے ہیں۔
یارڈ کے اندر کارگو کی نقل و حرکت کو مزید بہتر بنانے کے لیے ستائیس نئے ٹریلرز کو بھی شامل کر لیا گیا ہے۔
ان تمام جدید انتظامات کے نفاذ سے جہازوں کے ٹرن اراؤنڈ ٹائم اور پورٹ کی مجموعی پیداواری صلاحیت میں خاطر خواہ بہتری آ رہی ہے۔
پورٹ کے زمینی رابطوں کو وسعت دینے کے لیے کے آئی سی ٹی ٹرین منصوبے کے تحت کراچی کو لاہور سے جیا باگہ ڈرائی پورٹ کے ذریعے منسلک کیا جا رہا ہے۔
اس ٹرین منصوبے کی تکمیل سے مال برداری کے نظام کو ایک نیا فروغ ملے گا اور ترسیل کا عمل مزید آسان ہوگا۔
بندرگاہ کی سکیورٹی کے امور کو زیادہ مؤثر اور فول پروف بنانے کے لیے چہرے کی شناخت پر مبنی ڈیجیٹل تصدیقی نظام بھی متعارف کرا دیا گیا ہے۔
داخلی دروازوں پر بیرونی ڈرائیوروں کی بائیومیٹرک رجسٹریشن اور فوری تصدیق کا جدید نظام مکمل طور پر فعال کر دیا گیا ہے۔
کے پی ٹی کے جاری کردہ اعداد و شمار کے مطابق کراچی پورٹ پر اب تک تئیس ہزار سے زائد بیرونی ڈرائیوروں کی رجسٹریشن مکمل کی جا چکی ہے۔
ترجمان نے مزید بتایا کہ ڈرائیوروں کی اس ڈیجیٹل تصدیق کو ٹرمینل آپریٹنگ سسٹم کے ساتھ کامیابی سے منسلک کر دیا گیا ہے۔
اس ڈیجیٹل انضمام کے ذریعے بندرگاہ کے اندر داخلی راستوں پر آمدورفت کے عمل کو مزید شفاف اور محفوظ بنایا جا رہا ہے۔
دوسری جانب کسٹم ایجنٹس کی جانب سے بھی کنسائمنٹس کی نقل و حمل کے عمل کو مزید آسان بنانے کے لیے اپنی تجاویز متعلقہ حکام کو ارسال کر دی گئی ہیں۔
اپنی رائے دیں