مغربی افریقہ کے ملک سینیگال کے شمال مغربی ساحل کے قریب تارکین وطن کو لے جانے والی ایک چھوٹی کشتی ڈوبنے کے نتیجے میں کم از کم 34 افراد ہلاک ہو گئے ہیں۔ حادثے کا شکار ہونے والی کشتی میں غیر قانونی طور پر ہجرت کرنے کے خواہشمند افراد سوار تھے۔
یہ حادثہ سینیگال کے دارالحکومت ڈاکار اور شمالی شہر سینٹ لوئس کے درمیان واقع کی بے مر کے علاقے میں لومپول کے ریت کے تودوں کے قریب پیش آیا۔ سینیگال کی پریس ایجنسی کے مطابق زیادہ تر ہلاک ہونے والے افراد کا تعلق اسی محکمے کے لیونا اور تھیپے اضلاع سے تھا۔
سینیگال کی وزارتِ داخلہ کی جانب سے جاری کردہ بیان کے مطابق حکام نے ایک شخص کو بحفاظت بچا لیا ہے جبکہ حادثے کے بعد امدادی کارروائیاں تاحال جاری ہیں۔ انسانی حقوق کی تنظیم ایکشن فار ہیومن رائٹس اینڈ فرینڈ شپ نے بھی ہلاکتوں کی اس تعداد کی تصدیق کی ہے۔
اقوام متحدہ کی بین الاقوامی تنظیم برائے مہاجرت کے مطابق بحر اوقیانوس کا یہ خطرناک راستہ مغربی افریقہ سے یورپ جانے والے تارکین وطن کے لیے ایک بنیادی راستہ سمجھا جاتا ہے۔ حالیہ برسوں کے دوران مغربی افریقہ سے اسپین کے جزائر کینری پہنچنے کی کوشش میں ہزاروں افراد اپنی جانیں گنوا چکے ہیں۔
اپنی رائے دیں