انگلینڈ میں کلب کرکٹ کے دوران دھوکہ دہی کے ایک انوکھے واقعے میں ایمیچور کرکٹر برائن ڈیوائن پر دو سال کی پابندی عائد کر دی گئی ہے۔ برائن ڈیوائن پر الزام تھا کہ انہوں نے میچ کے دوران فیلڈنگ کرتے ہوئے انگلیوں سے چٹکی بجا کر گیند کے بلے سے لگنے کی جعلی آواز نکالی تاکہ امپائر کو بیٹر کو آؤٹ دینے پر مجبور کیا جا سکے۔
یہ واقعہ رواں سال جولائی میں نارتھ یارکشائر اینڈ ساؤتھ ڈرہم کرکٹ لیگ کے ڈویژن ٹو میچ کے دوران پیش آیا، جس میں سالٹ برن سیکنڈ الیون اور نور ٹن کی ٹیمیں مدمقابل تھیں۔ سوشل میڈیا پر وائرل ہونے والی ویڈیو میں دیکھا جا سکتا ہے کہ گیند بیٹر کے قریب سے گزرتی ہے اور سلپ میں کھڑے برائن ڈیوائن انگلیوں سے آواز نکالتے ہیں، جس کے بعد امپائر نے بیٹر کو آؤٹ قرار دے دیا تھا۔
لیگ انتظامیہ کی جانب سے کرائے گئے تفصیلی تحقیقاتی عمل کے بعد برائن ڈیوائن کو انگلینڈ اینڈ ویلز کرکٹ بورڈ کے دائرہ اختیار میں آنے والی تمام کرکٹ سرگرمیوں سے 29 ستمبر 2028 تک معطل کر دیا گیا ہے۔ اس پابندی کے دوران وہ نہ صرف کھیل سکتے ہیں اور نہ ہی کوچنگ، امپائرنگ، اسکورنگ یا جونیئر ٹیموں کی انتظامی ذمہ داریاں نبھا سکتے ہیں۔
لیگ انتظامیہ کے مطابق تحقیقات کے دوران برائن ڈیوائن اور ان کے کلب کے خلاف متعدد میچوں میں غیر اخلاقی رویے کی شکایات موصول ہوئی تھیں۔ کلب نے ابتدائی طور پر سزاؤں کے خلاف اپیل دائر کی تھی، تاہم بعد ازاں کھلاڑی اور کلب دونوں نے اپنے اوپر عائد الزامات کو تسلیم کر لیا۔
اس اسکینڈل کے نتیجے میں سالٹ برن سیکنڈ الیون کو ڈویژن ٹو سے ڈویژن تھری میں تنزلی کا سامنا کرنا پڑا ہے، جبکہ انہیں 2027 کے سیزن کے آغاز میں 60 پوائنٹس کی کٹوتی کا بھی سامنا ہوگا۔ اس کے علاوہ کلب پر 300 پاؤنڈز کا جرمانہ بھی عائد کیا گیا ہے۔
لیگ انتظامیہ نے اپنے بیان میں کہا ہے کہ اس واقعے نے متعلقہ افراد پر شدید دباؤ ڈالا اور کلب کے ارکان کو آن لائن اور ذاتی سطح پر تنقید کا سامنا کرنا پڑا۔ انتظامیہ نے اب اس تادیبی کارروائی کے مکمل ہونے کا اعلان کرتے ہوئے تمام فریقین سے اس معاملے کو ختم کرنے کی اپیل کی ہے۔
اپنی رائے دیں