ممبئی(3 نومبر 2026): بالی ووڈ کے سپر اسٹار شاہ رخ خان کی آنے والی انتہائی متوقع فلم ‘کنگ’ نے ریلیز سے قبل ہی 665 کروڑ روپے کے بزنس کے ساتھ دھوم مچا دی۔
بالی ووڈ کے سپر اسٹار شاہ رخ خان کی آنے والی انتہائی متوقع فلم ‘کنگ’ نے سنیما گھروں کی زینت بننے سے پہلے ہی بڑی کامیابی حاصل کرتے ہوئے ریلیز سے قبل 665 کروڑ روپے کے ریکارڈ پری ریلیز بزنس کے معاہدے حاصل کر لیے ہیں۔
تاہم، ان بھاری بھرکم اعداد و شمار نے فلم کے لیے باکس آفس پر لاگت پوری کرنے کا ایک بہت بڑا ہدف بھی کھڑا کر دیا ہے۔
ہدایت کار سدھارتھ آنند کی زیرِ ہدایت بننے والی اس فلم نے دسمبر میں اپنی ریلیز سے قبل ہی نمایاں ڈیجیٹل اور ڈسٹری بیوشن ڈیلز سمیٹ لی ہیں۔
فلم کی تشہیری مہم کا باقاعدہ آغاز 2 نومبر کو شاہ رخ خان کی سالگرہ کے موقع پر فلم کا پہلا گانا ریلیز کر کے کیا جا چکا ہے۔
پنک ولا کی ایک رپورٹ کے مطابق فلم کے بیرونِ ملک ڈسٹری بیوشن رائٹس فارس فلمز نے مبینہ طور پر 175 کروڑ روپے کی کم از کم گارنٹی پر حاصل کیے ہیں۔
جبکہ فلم کے بھارتی ڈسٹری بیوشن رائٹس پین مرودھر کو 250 کروڑ روپے میں فروخت کیے گئے۔
رپورٹ میں مزید بتایا گیا ہے کہ نامور اسٹریمنگ پلیٹ فارم نیٹ فلکس نے 150 کروڑ روپے میں اس کے ڈیجیٹل رائٹس خریدے ہیں۔
اس کے علاوہ سیٹلائٹ رائٹس 25 کروڑ روپے جبکہ میوزک رائٹس نے مزید 65 کروڑ روپے کا بزنس حاصل کیا ہے۔
ان تمام معاہدوں کو ملا کر فلم نے مجموعی طور پر 665 کروڑ روپے کا پری ریلیز بزنس کیا ہے، البتہ اسٹریمنگ ڈیل کی حتمی مالیت فلم کی سنیما گھروں میں کارکردگی پر منحصر ہو سکتی ہے۔
ان تمام بڑی ڈیلز کے باوجود ‘کنگ’ کو باکس آفس پر ایک کڑا مالیاتی ہدف درپیش ہے۔
فلم کا ابتدائی بجٹ 300 کروڑ روپے تھا، تاہم ساکنلک اور پنکولا کی رپورٹس کے مطابق پروڈکشن کے اخراجات بڑھ کر تقریباً 400 کروڑ روپے تک پہنچ گئے ہیں۔
اس کے علاوہ مارکیٹنگ اور تشہیری اخراجات کا تخمینہ بھی تقریباً 50 کروڑ روپے لگایا گیا ہے۔
شاہ رخ خان کی فیس کو ملا کر فلم کی مجموعی لاگت تقریباً 550 کروڑ روپے تک پہنچنے کی توقع ہے۔
یہی وجہ ہے کہ پروڈیوسرز اور ڈسٹری بیوٹرز کے مالی اہداف پورے کرنے کے لیے فلم کو دنیا بھر کے باکس آفس سے کم از کم 800 کروڑ روپے کمانا ہوں گے۔
واضح رہے کہ فلم ‘کنگ’ 2023 کی بلاک بسٹر فلم ‘پٹھان’ کے بعد شاہ رخ خان اور سدھارتھ آنند کا دوسرا بڑا اشتراک ہے، اور یہ فلم ‘ڈنکی’ کے بعد تین سال سے زائد عرصے میں شاہ رخ خان کی پہلی سنیما ریلیز ہوگی۔
فلم ‘کنگ’ کو رواں سال 24 دسمبر 2026 کو سینما گھروں میں نمائش کے لیے پیش کیا جانا ہے۔
اپنی رائے دیں