قومی کھلاڑی محمد شعیب نے دسویں شہریار ملک میموریل پاکستان اوپن ٹینس چیمپیئن شپ 2026 میں مردوں کے سنگلز کا ٹائٹل اپنے نام کر لیا۔ انہوں نے فائنل معرکے میں حریف کھلاڑی کے خلاف شاندار کارکردگی کا مظاہرہ کرتے ہوئے کامیابی حاصل کی۔
یہ ٹورنامنٹ لاہور کے علاقے نشتر پارک میں واقع سپورٹس بورڈ پنجاب ٹینس اکیڈمی میں کھیلا گیا۔ ہفتے کے روز ہونے والے فائنل میں ٹاپ سیڈ محمد شعیب کا مقابلہ برکت اللہ سے ہوا۔
محمد شعیب نے سخت اور اعصاب شکن مقابلے کے بعد برکت اللہ کو چھ صفر، چار چھ اور چھ تین سے شکست دی۔ اس فتح کے ساتھ ہی انہوں نے چیمپیئن شپ کا ٹائٹل اپنے سر سجا لیا۔
دوسری جانب مینز ڈبلز کا ٹائٹل برکت اللہ اور یوسف خلیل کی جوڑی نے جیت لیا۔ خواتین کے سنگلز فائنل میں پاکستان کی معروف ٹینس سٹار اشنا سہیل نے مہک کوکھر کو ایک چھ اور چار چھ سے ہرایا۔
اشنا سہیل نے مہک کوکھر کے ساتھ مل کر لیڈیز ڈبلز کا فائنل بھی چھ ایک اور چھ ایک سے جیت کر ڈبل ٹائٹل کا اعزاز حاصل کیا۔ جونیئر کیٹیگریز میں فاطمہ گروپ کے ایم ایان نے غیر معمولی کارکردگی دکھاتے ہوئے ٹرپل کر ان اپنے نام کیا۔
ایم ایان نے بوائز انڈر بارہ سنگلز کے فائنل میں مصطفی عزیر رانا کو چار ایک اور چار ایک سے زیر کیا۔ انہوں نے بوائز انڈر بارہ ڈبلز کے فائنل میں ابر اہم لغاری کے ساتھ مل کر چار صفر اور ایک صفر ریٹائرڈ سے کامیابی حاصل کی۔
ایم ایان نے بوائز انڈر چودہ سنگلز کے فائنل میں ایم معاذ کو چار دو اور چار دو سے شکست دی۔ گرلز انڈر بارہ سنگلز میں ایمان شہباز نے شاہ نور عمر کو ایک چار، چار صفر اور چار ایک سے ہرایا۔
گرلز انڈر چودہ سنگلز کے فائنل میں خدیجہ خلیل نے ایمان شہباز کو چار صفر اور چار صفر سے آؤٹ کلاس کیا۔ سینئرز پینتالیس پلس ڈبلز میں ہادی حسین اور ڈاکٹر صہیب کی جوڑی نے فیاض خان اور محبوب وحید کو چھ ایک اور چھ ایک سے شکست دی۔
سینئرز پچپن پلس ڈبلز کے مقابلے میں عارف فیروز اور ڈاکٹر عارف نے سلیم اور شاداب کو چھ دو اور چھ تین سے ہرایا۔ چیمپیئن شپ کی اختتامی تقریب کے مہمانِ خصوصی پاکستان ٹینس فیڈریشن کے صدر اعصام الحق قریشی اور سابق سیکرٹری سپورٹس پنجاب فضل الرحمن تھے۔
مہمانِ خصوصی نے نصیر ملک اور رشید ملک کے ہمراہ کامیاب اور رنر اپ کھلاڑیوں میں ٹرافیاں اور انعامات تقسیم کیے۔ اس موقع پر رشید ملک نے سپانسرز اور کارپوریٹ سیکٹر کے تعاون کا شکریہ ادا کیا۔ انہوں نے امید ظاہر کی کہ آئندہ ایڈیشنز میں پاکستان اوپن ٹینس چیمپیئن شپ کو مزید وسعت دی جائے گی۔
اپنی رائے دیں