پنجاب سیف سٹیز اتھارٹی کے گم شدہ افراد کی تلاش کے خصوصی منصوبے 'میرا پیارا' نے ایک اور بڑی انسانی کامیابی حاصل کرتے ہوئے 40 سال سے اپنے خاندان سے بچھڑی بنگلہ دیشی خاتون حلیمہ کے اہل خانہ کا سراغ لگا لیا ہے۔
اس حوالے سے ترجمان پنجاب سیف سٹیز اتھارٹی نے بتایا کہ بنگلہ دیش سے تعلق رکھنے والی حلیمہ سال 2013 میں اسلام آباد سے لاوارث حالت میں ملی تھیں۔
خاتون اردو زبان سے مکمل طور پر ناواقف تھیں جس کی وجہ سے وہ اپنی شناخت، اپنے آبائی علاقے یا خاندان کے بارے میں کوئی بھی ٹھوس معلومات فراہم کرنے سے قاصر تھیں۔
ان کی حالت کو دیکھتے ہوئے انہیں عارضی رہائش اور دیکھ بھال کے لیے ایدھی سینٹر منتقل کر دیا گیا تھا، جہاں وہ گزشتہ کئی برسوں سے مقیم تھیں۔
سیف سٹی کی 'میرا پیارا' ٹیم نے اس کیس پر کام شروع کیا اور خاتون کی جانب سے فراہم کردہ انتہائی محدود معلومات کی بنیاد پر ان کے خاندان کی تلاش کا باقاعدہ آغاز کیا۔
ٹیم نے سوشل میڈیا، مقامی انتظامیہ اور دیگر دستیاب ذرائع کو بروئے کار لاتے ہوئے اپنی کوششوں کا دائرہ کار بنگلہ دیش تک وسیع کر دیا۔
خاتون کے بتائے گئے آبائی گاؤں اور اپنے رشتہ داروں کے ناموں کی مدد سے سیف سٹی کی ٹیم بالآخر بنگلہ دیش میں موجود ان کے بیٹے اور بھتیجے تک پہنچنے میں کامیاب ہو گئی۔
بعد ازاں مقامی حکام اور اہل خانہ سے براہِ راست رابطہ قائم کیا گیا تاکہ فراہم کردہ معلومات کی باقاعدہ تصدیق کی جا سکے، جس کے بعد ان کے خاندان کی شناخت کی تصدیق ہوئی۔
پنجاب سیف سٹیز اتھارٹی کے ترجمان کا اس کامیابی پر کہنا ہے کہ 'میرا پیارا' منصوبہ سرحدوں سے بالاتر ہو کر انسانیت کی خدمت اور بچھڑے ہوئے افراد کو ان کے پیاروں سے ملانے کے لیے مسلسل فعال ہے۔
ترجمان نے مزید بتایا کہ یہ ادارہ اس سے قبل بھی 40 سال سے بچھڑی ایک اور بنگلہ دیشی خاتون کوہ نور کے خاندان کی تلاش بھی کامیابی سے مکمل کر چکا ہے، جو کہ انسانی خدمت کی ایک قابلِ تحسین مثال ہے۔
حلیمہ کے اہل خانہ کی تلاش اس عزم اور مسلسل جدوجہد کی ایک اور نمایاں کامیابی ہے جس پر سیف سٹی ٹیم کو سراہا جا رہا ہے۔
ترجمان نے شہریوں سے اپیل کی ہے کہ کسی بھی گم شدہ یا لاوارث شخص کی اطلاع دینے کے لیے پنجاب بھر میں ایمرجنسی ہیلپ لائن 15 پر کال کریں۔
شہریوں کو ہدایت کی گئی ہے کہ وہ 'میرا پیارا' سروس کے لیے 15 پر کال کرنے کے بعد 3 کا بٹن دبائیں تاکہ بروقت کارروائی کے ذریعے بچھڑے ہوئے افراد کو ان کے پیاروں سے ملایا جا سکے۔
اپنی رائے دیں