برطانوی اداکار رسل برینڈ کے خلاف ریپ کے مقدمے کی سماعت جاری

برطانیہ میں معروف کامیڈین اور اداکار رسل برینڈ کے خلاف جنسی زیادتی اور ریپ کے سنگین الزامات پر مبنی مقدمے کی سماعت ساؤتھ وارک کراؤن کورٹ میں جاری ہے۔ مقدمے میں استغاثہ کی جانب سے پیش کی گئی ایک خاتون نے اداکار پر 2004 میں ریپ کا الزام عائد کیا ہے۔

عدالت میں اپنا بیان ریکارڈ کرواتے ہوئے خاتون نے بتایا کہ یہ واقعہ لندن کے علاقے سو ہو میں ایک بار میں پیش آیا۔ ان کے مطابق رسل برینڈ نے ابتدا میں ان کے ساتھ نامناسب رویہ اختیار کیا اور بعد ازاں انہیں زبردستی بیت الخلا میں لے جا کر زیادتی کا نشانہ بنایا۔

خاتون نے جیوری کو بتایا کہ اس وقت ان کی عمر 20 برس تھی اور وہ اس واقعے کے بعد شدید صدمے اور سکتے کی کیفیت میں تھیں۔ انہوں نے موقف اختیار کیا کہ اس دور میں سماجی دباؤ اور مردوں کی بالادستی والی فضا کے باعث وہ شکایت درج کروانے سے خوفزدہ تھیں۔

مقدمے کی سماعت کے دوران 2023 میں پولیس کو دیے گئے خاتون کے ویڈیو انٹرویو کی ریکارڈنگ بھی دکھائی گئی۔ خاتون نے بیان دیا کہ وہ اداکار کے ساتھ ایک ٹی وی پروگرام کے حوالے سے گفتگو کر رہی تھیں جب مبینہ طور پر ان پر حملہ کیا گیا۔

خاتون نے عدالت کو بتایا کہ انہوں نے مزاحمت کرنے کی کوشش کی لیکن اداکار کی گرفت بہت مضبوط تھی۔ انہوں نے کہا کہ اس وقت ان کے ذہن میں صرف یہ خیال تھا کہ کسی طرح یہ صورتحال ختم ہو اور وہ وہاں سے نکل سکیں۔

شکایت کنندہ نے مزید بتایا کہ مبینہ واقعے کے بعد رسل برینڈ کا رویہ انتہائی غیر متوقع تھا اور انہوں نے ایسے ظاہر کیا جیسے کچھ ہوا ہی نہ ہو۔ خاتون کے مطابق اداکار نے ان سے معمول کے مطابق رابطہ نمبر مانگنے کی کوشش کی۔

رسل برینڈ کے وکیل ایان ونٹر کے سی نے جرح کے دوران ان الزامات کو مسترد کر دیا۔ انہوں نے عدالت میں موقف اختیار کیا کہ اگر کوئی جنسی رابطہ ہوا بھی تو وہ دونوں کی باہمی رضا مندی سے تھا، تاہم بیت الخلا کی گندی حالت کے باعث اسے مکمل نہیں کیا جا سکا۔

اداکار کے وکیل نے خاتون سے سوال کیا کہ اگر وہ واقعے کے وقت مزاحمت کر رہی تھیں تو مدد کے لیے پکارنا کیوں ممکن نہیں تھا؟ جس پر خاتون نے جواب دیا کہ وہ اداکار کی گرفت میں جکڑی ہوئی تھیں اور شدید خوف کا شکار تھیں۔

خاتون نے عدالت کو یہ بھی بتایا کہ انہوں نے اس واقعے کے بارے میں ایک دوست کو بتایا تھا لیکن اس وقت وہ قانونی اصطلاحات سے واقف نہیں تھیں اور یہ نہیں جانتی تھیں کہ ان کے ساتھ ہونے والی زیادتی کو قانونی طور پر ریپ شمار کیا جا سکتا ہے۔

رسل برینڈ پر مجموعی طور پر سات الزامات عائد کیے گئے ہیں جن میں ریپ کے تین، جنسی حملے کے تین اور غیر اخلاقی حملے کا ایک الزام شامل ہے۔ یہ مبینہ واقعات 1999 سے 2009 کے درمیان پیش آئے جن میں چھ خواتین نے اداکار پر الزامات لگائے ہیں۔

اداکار نے اپنے خلاف عائد تمام سات الزامات کی سختی سے تردید کی ہے۔ ان کا کہنا ہے کہ اگر کوئی جنسی رابطہ ہوا بھی تھا تو وہ باہمی رضا مندی سے ہوا ہوگا۔

عدالت میں موجود جیوری کو بتایا گیا کہ اس مقدمے کی سماعت تقریباً چھ ہفتوں تک جاری رہنے کی توقع ہے۔

خاتون نے اپنے بیان کے آخر میں کہا کہ اب حالات بدل چکے ہیں۔ مقدمے کی مزید کارروائی جاری ہے۔