نیشنل ڈیزاسٹر مینجمنٹ اتھارٹی نے ملک گیر سطح پر غیر معمولی موسمی صورتحال کے پیش نظر الرٹ جاری کر دیا ہے۔ این ڈی ایم اے کے تحت قائم نیشنل ایمرجنسیز آپریشن سینٹر نے خدشہ ظاہر کیا ہے کہ آئندہ چوبیس گھنٹوں کے دوران ملک کے مختلف حصوں میں تیز ہواؤں اور اندھی کے ساتھ بارش اور پہاڑی علاقوں میں برف باری ہو سکتی ہے۔
نیشنل ایمرجنسیز آپریشن سینٹر کی جانب سے جاری کردہ پیشگوئی کے مطابق اگلے 12 سے 24 گھنٹوں کا وقت موسمی تبدیلیوں کے لحاظ سے انتہائی اہم ہے۔ ادارہ جات کو متوقع موسمی حالات سے نپٹنے اور کسی بھی ہنگامی صورتحال سے بچنے کے لیے تیار رہنے کی ہدایت کی گئی ہے۔
اس الرٹ کے دائرہ کار میں وفاقی دارالحکومت اسلام آباد سمیت تمام صوبے شامل ہیں۔ پنجاب، خیبرپختونخوا، سندھ اور بلوچستان کے متعدد اضلاع میں تیز رفتار ہواؤں اور طوفانی بارشوں کا امکان ظاہر کیا گیا ہے جس سے روزمرہ کی زندگی اور ٹریفک کی روانی متاثر ہو سکتی ہے۔
بالائی اور پہاڑی علاقوں کے حوالے سے ہدایت کی گئی ہے کہ وہاں شدید برف باری کا امکان ہے جس سے سڑکیں بند ہونے اور مواصلاتی نظام متاثر ہونے کا خدشہ ہے۔ این ڈی ایم اے نے ان علاقوں میں رہنے والے لوگوں اور سیاحوں کو بالخصوص محتاط رہنے کی ہدایت کی ہے۔
این ڈی ایم اے اور نیشنل ایمرجنسیز آپریشن سینٹر نے عام شہریوں اور مسافروں کے لیے خصوصی سفری ہدایات جاری کی ہیں۔ حکام نے شہریوں پر زور دیا ہے کہ وہ موسمی حالات بہتر ہونے تک غیر ضروری سفر سے مکمل طور پر گریز کریں تاکہ کسی بھی حادثے یا پریشانی سے بچا جا سکے۔
ترجمان کے مطابق تیز ہواؤں اور بارش کے دوران کھلی جگہوں، بوسیدہ عمارتوں، بجلی کے پولز اور سائبانوں کے قریب کھڑے ہونے سے پرہیز کرنا چاہیے تاکہ مالی و جانی نقصان سے بچا جا سکے۔ شہریوں کو یہ بھی مشورہ دیا گیا ہے کہ وہ اپنے گھروں میں حفاظت کو ترجیح دیں۔
این ڈی ایم اے نے تمام متعلقہ صوبائی اور مقامی ڈیزاسٹر مینجمنٹ اتھارٹیز کو الرٹ رہنے اور اپنے وسائل متحرک رکھنے کی ہدایت کی ہے تاکہ کسی بھی ہنگامی صورتحال میں فوری کارروائی کی جا سکے۔ شاہراہوں کی بحالی کے ادارے اور ریسکیو ٹیموں کو بھی چوکس کر دیا گیا ہے۔
پہاڑی اور بالائی علاقوں میں زمینی رابطوں کی بحالی اور برف ہٹانے کے لیے درکار بھاری مشینری اور عملے کو تیار رکھنے کا حکم دیا گیا ہے۔ لینڈ سلائیڈنگ یا سڑکوں پر برف جمنے کی صورت میں فوری طور پر راستے صاف کرنے کے اقدامات پر زور دیا گیا ہے۔
بلوچستان اور سندھ کے میدانی و ساحلی علاقوں سمیت خیبرپختونخوا اور پنجاب کے مختلف شہروں میں تیز ہواؤں کی وجہ سے کمزور ڈھانچوں اور سائن بورڈز کو خطرناک قرار دیتے ہوئے مقامی انتظامیہ کو ان کی نگرانی کی ہدایت کی گئی ہے۔
نیشنل ایمرجنسیز آپریشن سینٹر نے شہریوں کو موسم کی صورتحال کے بارے میں آگاہ رہنے اور سرکاری اطلاعات و رہنمائی پر عمل کرنے کی تلقین کی ہے۔ مسافروں کو ہدایت کی گئی ہے کہ وہ سفر پر روانہ ہونے سے قبل سڑکوں کی صورتحال کا جائزہ لیں۔
این ڈی ایم اے کی جانب سے ملک کے اہم قومی شاہراہوں اور موٹرویز کے مسافروں کے لیے بھی محتاط ڈرائیونگ کی ہدایت کی گئی ہے۔ تیز ہواؤں اور شدید بارش کے باعث سڑکوں پر پھسلن اور نظر آنے کی حد کم ہونے کے خطرات بڑھ جاتے ہیں۔
موسمیاتی تبدیلیوں کے اس سلسلے سے متعلق تمام متعلقہ اداروں کو اپ ڈیٹ رہنے کا کہا گیا ہے تاکہ ضرورت پڑنے پر مقامی سطح پر فوری اور مؤثر اقدامات اٹھائے جا سکیں۔ ملک بھر میں اضلاع کے ریسکیو اور ایمرجنسی سروسز کے کنٹرول رومز کو مکمل متحرک کر دیا گیا ہے۔
این ڈی ایم اے کا کہنا ہے کہ شہری ہنگامی حالات میں مقامی انتظامہ یا ریسکیو ہیلپ لائنز سے رابطہ قائم رکھیں تاکہ بروقت مدد فراہم کی جا سکے۔ حکام نے اعادہ کیا ہے کہ عوام کا تعاون اور احتیاطی تدابیر پر عمل درآمد ہی کسی بڑے جانی یا مالی نقصان کو روکنے کا بہترین طریقہ ہے۔
قومی ڈیزاسٹر مینجمنٹ اتھارٹی کا نیشنل ایمرجنسیز آپریشن سینٹر ملک بھر کے تمام علاقوں میں موسمی حالات کی مسلسل نگرانی کر رہا ہے۔ این ڈی ایم اے کے مطابق آنے والے گھنٹوں میں موسم میں مزید تبدیلی کی صورت میں تازہ ترین الرٹ اور رہنمائی جاری کی جاتی رہے گی۔
اپنی رائے دیں