پاکستان اور جنوبی افریقہ کے درمیان ون ڈے جنگ شروع، کون جیتے گا؟

پاکستان اور جنوبی افریقہ کے درمیان ون ڈے سیریز کل سے شروع ہوگی۔

پہلا میچ پارل میں کھیلا جائے گا۔

پاکستان اور جنوبی افریقہ کے درمیان تین میچوں کی سیریز کا پہلا ون ڈے انٹرنیشنل کل پارل کے بولینڈ پارک میں کھیلا جائے گا۔ دوسرا میچ 19 دسمبر کو نیولینڈز کیپ ٹاؤن اور تیسرا میچ 22 دسمبر کو وانڈررز جوہانسبرگ میں ہوگا۔ تینوں میچز پاکستانی وقت کے مطابق شام پانچ بجے شروع ہونگے۔

جنوبی افریقہ نے پاکستان کے خلاف ٹی ٹوئنٹی سیریز دو صفر سے جیتی ہے۔ ون ڈے سیریز دونوں ٹیموں کے لیے بہت اہمیت کی حامل ہے کیونکہ وہ فروری اور مارچ 2025 میں ہونے والی آئی سی سی چیمپئنز ٹرافی کے لیے اپنی تیاریوں کو بہتر بنانا چاہتی ہیں۔

پاکستان کے اسکواڈ میں فاسٹ بولر نسیم شاہ، اوپنر عبداللہ شفیق اور ٹاپ آرڈر بیٹر کامران غلام کی واپسی ہوئی ہے جبکہ لیفٹ آرم لیگ اسپنر سفیان مقیم اور عثمان خان پہلی بار ون ڈے اسکواڈ کا حصہ بنے ہیں۔ محمد رضوان کی بحیثیت کپتان یہ تیسری ون ڈے سیریز ہوگی اس سے قبل انہوں نے آسٹریلیا اور زمبابوے کے خلاف ون ڈے سیریز جیتی ہیں ۔

ون ڈے انٹرنیشنل میں پاکستان نے اپریل 2021 میں جنوبی افریقہ میں تین میچوں کی سیریز 2-1 سے جیتی تھی۔

کپتان محمد رضوان کا کہنا ہے کہ آئی سی سی چیمپئنز ٹرافی کے لیے ہماری تیاریوں کے لحاظ سے یہ ایک اہم ون ڈے سیریز ہے اور مجھے یقین ہے کہ کھلاڑی آسٹریلیا کے خلاف تاریخی سیریز میں جیت کے بعد اپنی کارکردگی کو دوہرائیں گے۔

ہم ٹی ٹوئنٹی سیریز میں مطلوبہ نتائج حاصل نہیں کر سکے لیکن میں ان کنڈیشنز میں ہمارے کھلاڑیوں کی کارکردگی سے بہت خوش ہوں خاص طور پر صائم کی بیٹنگ دونوں میچوں میں شاندار تھی۔ ہماری بیٹنگ اور بولنگ ، ایک مکمل طاقت والی جنوبی افریقی ٹیم کو چیلنج کرنے اور اللہ تعالیٰ کی مدد سے سیریز جیتنے کی صلاحیت رکھتی ہے۔

مجھے اپنے ون ڈے اسکواڈ میں نوجوان اور تجربہ کار کھلاڑیوں کے ساتھ بہت زیادہ صلاحیت نظر آتی ہے جو قدم آگے بڑھانے کے لیے تیار ہیں جس سے نہ صرف اس سیریز میں بلکہ آنے والی ہوم سہ فریقی اور میگا ایونٹ کے لیے بھی ہمارے لیے اچھا موقع ہے۔

پاکستان ون ڈے اسکواڈ: محمد رضوان (کپتان اور وکٹ کیپر ) عبداللہ شفیق، ابرار احمد، بابر اعظم، حارث رؤف، کامران غلام، محمد حسنین، محمد عرفان خان، نسیم شاہ، صائم ایوب، سلمان علی آغا، شاہین شاہ آفریدی، سفیان مقیم طیب طاہر اور عثمان خان( وکٹ کیپر) ۔

جنوبی افریقہ ون ڈے اسکواڈ: ٹیمبا باووما (کپتان) ایڈن مارکرم اینڈیل فیلووایو، ڈیوڈ ملر، ہینرک کلاسن (وکٹ کیپر) کیگیسو ربادا، کیشوو مہاراج، کے وینا مافاکا، مارکو جینسن، اوٹنیل بارٹمین، راسی وان ڈر ڈوسن، رائن رکلٹن ، تبریزشمسی، ٹونی ڈی زورزی اور ٹرسٹن اسٹبس۔

میچوں کا شیڈول: ( پاکستانی وقت کے مطابق ) ۔
17 دسمبر – پہلا ون ڈے بولینڈ بینک پارک، پارل (شام 5 بجے )
19 دسمبر – دوسرا ون ڈے نیو لینڈز کرکٹ گراؤنڈ، کیپ ٹاؤن (شام 5 بجے )
22 دسمبر – تیسرا ون ڈے دی وانڈررز اسٹیڈیم جوہانسبرگ (شام 5 بجے)
26 دسمبر – پہلا ٹیسٹ ۔سپر اسپورٹ پارک، سنچورین میں (دوپہر ایک بجے )
3 جنوری – دوسرا ٹیسٹ نیو لینڈز کرکٹ گراؤنڈ، کیپ ٹاؤن (دوپہر ایک بجے )