عدالت کو یقین دہانی کے باوجود عدم پیشی، پرویز الٰہی پر فرد جرم پھر ملتوی

ملزم کو گزشتہ سماعت پر بھی پیش نہیں کیا گیا، ایسے نہیں چلے گا’ عدالت کا اظہار برہمی
لاہور ( ڈیلی پاکستان آن لائن) سابق وزیراعلیٰ پنجاب چودھری پرویز الٰہی کے وکیل کی جانب سے عدالت کو یقین دہانی کے باوجود پیش نہ کیے جانے کی و جہ سے فرد جرم پھر ملتوی ہو گئی جبکہ عدالت نے برہمی کا بھی اظہار کیا۔پنجاب اسمبلی میں مبینہ غیر قانونی بھرتیوں کے مقدمے کی سماعت اینٹی کرپشن عدالت لاہور میں ہوئی، جس میں پرویز الٰہی کے وکیل عامر سعید راں نے پھر ایک روزہ حاضری معافی کی درخواست دائر کردی۔درخواست میں موقف اختیار کیا گیا کہ پرویز الٰہی کی طبیعت ناساز ہے اور ڈاکٹرز نے انہیں آرام کا مشورہ دیا ہے۔ اس موقع پر وکلاء کی جانب سے میڈیکل سرٹیفکیٹ بھی عدالت میں پیش کیا گیا۔عدالت نے پرویز الٰہی کو پیش نہ کیے جانے پر برہمی کا اظہار کرتے ہوئے کہا کہ ملزم گزشتہ تاریخ پر بھی پیش نہیں ہوا ، ایسے نہیں چلے گا، اس سلسلے میں کوئی حکم جاری کریں گے۔ آج پرویز الٰہی پر فرد جرم عائد ہونی ہے۔عدالت نے کہا کہ گزشتہ سماعت پر بھی آپ نے لکھ کر دیا تھا، آج میں پھر حاضری معافی کی درخواست پر فیصلہ کردیتا ہوں، کیس کل کے لیے رکھ لیتے ہیں، کل ملزم کو پیش کریں۔سرکاری وکیل نے کہا کہ انہوں نے کہا تھا کہ آئندہ سماعت پر پرویز الٰہی کو پیش کریں گے، اس طرح تو فرد جرم میں تاخیر ہو رہی ہے۔بعد ازاں عدالت نے کیس کی سماعت 18دسمبر تک ملتوی کر دی۔