بغض عمران خان ،پی ٹی آئی میں خیبر پی کے حکومت کیخلاف وائٹ نہیں فرمائشی پیپر جاری کیا گیا ‘ مسرت چیمہ

عوام وفاقی ،پنجاب حکومت کی بد ترین گورننس ،کرپشن کیخلاف ہر روز بلیک پیپر جاری کر رہے ہیں ‘ سینئر رہنما پی ٹی آئی
لاہور(ڈیلی پاکستان آن لائن)پاکستان تحریک انصاف کی سینئر رہنما مسرت جمشید چیمہ نے کہا ہے کہ وفاقی حکومت نے بغض عمران خان اور پی ٹی آئی میں خیبر پختوانخواہ حکومت کے خلاف وائٹ نہیں بلکہ فرمائشی پیپر جاری کیا ، طاقت کے نشے اور سیاسی مخالفت میں ایک صوبے کی حکومت کو تنقید کا نشانہ بنایا جارہا ہے جبکہ عوام حقیقت میں وفاقی اور پنجاب حکومت کی بد ترین گورننس ،خود نمائی اور کرپشن کے خلاف ہر روز بلیک پیپر جاری کر رہے ہیں ۔ اپنے بیان میں مسرت جمشید نے کہا کہ وفاقی حکومت صرف میڈیا میں دودھ اور شہد کی نہریں بہا رہی ہے جبکہ حقیقت اس کے برعکس ہے ، مہنگائی 38فیصد سے ساڑھے4فیصد آنے کے دعوے کئے جارہے ہیں جبکہ عوام کے لئے ایک وقت کی روٹی پوری کرنا محال ہے ۔ چینی، گھی،سبزیوں سمیت دیگر اشیائے خوردونوش کی قیمتوں میں کمی کی بجائے مزید اضافہ ہوا ہے ۔ انہوںنے کہا کہ آپ کھوکھلے دعوئوں سے عوام کی آنکھوں میں دھول نہیں جھو نک سکتی ، ان شا اللہ جب بھی انتخابات ہوں گے آپ کو اپنی سیاسی حیثیت اور مقبولیت کا اندازہ ہو جائے گا ۔