سال 2030ء تک آرگینک مصنوعات کی عالمی مارکیٹ کا حجم 375ارب ڈالر تک پہنچنے کا امکان ہے’ نجم مزاری

پاکستان کوعالمی مارکیٹ میں اپنا حصہ وصول کرنے کیلئے بلا تاخیر حکمت عملی مرتب کرنا ہو گی’ انٹر پینیور ، چیئرمین سی پی پی
لاہور( ڈیلی پاکستان آن لائن)ایک تخمینے کے مطابق 2030ء تک آرگینک مصنوعات کی عالمی مارکیٹ کا حجم 375ارب ڈالر تک پہنچنے کا امکان ہے ، خطے کے ممالک نے بھی اس پر توجہ مرکوز کر لی ہے اور 2023میں روایتی حریف ملک کی آرگینک فوڈ مارکیٹ 2.07ارب ڈالر تک پہنچ گئی ، اگر پاکستان نے عالمی مارکیٹ میں اپنا حصہ وصول کرنا ہے تو اسے بھی بلا تاخیر حکمت عملی مرتب کرنا ہو گی ۔ ان خیالات کا اظہار انٹر پینیور اور پاکستان میں آرگنینک مصنوعات پر ریسرچ اور تیاری کرنے والے ادارے چلتن پیورو پاکستان کے چیئرمین نجم الدین مزاری نے مختلف یونیورسٹیز کے طلبہ کے وفد سے ملاقات میں گفتگو کرتے ہوئے کیا ۔ اس موقع پر سوالات و جوابات کا سیشن بھی ہوا ۔ انہوںنے کہا کہ پاکستان میں بھی آرگینک مصنوعات کے استعمال کے رجحان میں نمایاں اضافہ دیکھنے میں آیا ہے اور اس کے لئے مختلف ممالک سے درآمدات بھی کی جارہی ہیں ۔ انہوں نے کہا کہ ہم گزشتہ کئی سالوں سے آرگینک فوڈ اور دیگر مصنوعات کی تیاری کے لئے بھرپور ریسرچ کر کے عملی پیشرفت کر رہے ہیں ۔ اس کے ساتھ لوگوں کو صحت کے حوالے سے اس کی افادیت سے بھی آگاہی دے رہے ہیں ۔ انہوں نے کہا کہ چین بھی بڑی مارکیٹ کے طور پر ابھر رہا ہے ،پاکستان کو چین کے ساتھ جوائنٹ وینچر کرنا چاہیے اور اس کے ذریعے ہمیں عالمی منڈیوں تک رسائی بھی حاصل ہو گی ۔