یونان کشتی حادثے میں ملوث انسانی سمگلروں سمیت 9ملزمان گرفتار

گرفتار ملزمان بھاری رقوم وصول کر کے روپوش ہوگئے تھے، دیگر ملزمان کی گرفتاری کے لئے چھاپے
لاہور ( ڈیلی پاکستان آن لائن) فیڈرل انویسٹی گیشن ایجنسی (ایف آئی اے) نے یونان کشتی حادثے میں ملوث انسانی سمگلروں سمیت 9ملزمان کو گرفتار کر لیا۔ترجمان کے مطابق ایف آئی اے گوجرانوالہ زون نے کارروائی کر کے ملزمان کو گوجرانوالہ اور گجرات کے مختلف علاقوں سے گرفتار کیا، ملزمان کی شناخت محمد شفیق، عظمت علی، خضر حیات، مرزا سکندر، محمد نواز، شاہد امین، شہزاد یوسف، ظفر اقبال، اسد عباس کے نام سے ہوئی۔حکام کا کہنا ہے کہ گرفتار ملزمان میں یونان اور لیبیا کشتی حادثے میں ملوث انسانی سمگلر بھی شامل ہیں۔ایف آئی اے کے مطابق یونان کشتی حادثے میں ملوث بدنام زمانہ ایجنٹ ظفر اقبال کو گرفتار کر لیا گیا، ملزم معصوم بچوں کے اغوا اور بیرون ملک بھجوانے میں ملوث پایا گیا جسے منڈی بہائوالدین سے گرفتار کیا گیا، ملزم نے کمسن بچے کو اٹلی براستہ لیبیا بھجوانے کے نام پر 19لاکھ روپے اور 2300یورو ہتھیائے، سفر کے دوران یونان کے ساحل پر کشتی کو حادثہ پیش آیا اور بچے کی موت واقع ہوئی۔اس کے علاوہ لیبیا کشتی حادثے میں ملوث اشتہاری ملزم شہزاد یوسف کو کھاریاں سے گرفتار کیا گیا، ملزم نے شہری کو ملازمت کی غرض سے اٹلی براستہ لیبیا بھجوانے کے نام پر 23لاکھ روپے ہتھیائے، بعد ازاں ملزم نے متاثرہ شہری کو کشتی کے ذریعے لیبیا سے یونان بھجوانے کی کوشش کی۔ایف آئی اے کے مطابق ملزم محمد شفیق اور خضر حیات نے متاثرہ شہریوں کو غیر قانونی طریقے سے یونان بھجوانے کے نام پر فی کس 40لاکھ روپے ہتھیائے، ملزم عظمت علی نے یونان ملازمت کا جھانسہ دے کر شہری سے 50لاکھ روپے بٹورے جبکہ ملزم مرزا سکندر نے شکایت کنندہ کے 2 بیٹوں کو یورپ ملازمت کی غرض سے بھجوانے کیلئے 50لاکھ روپے وصول کئے۔حکام کے مطابق ملزم محمد نواز نے شہری کو کمبوڈیا ملازمت کی غرض سے بھجوانے کیلئے 10لاکھ سے زائد رقم وصول کی جبکہ ملزم شاہد امین نے شہری کو اٹلی ملازمت کی غرض سے بھجوانے کیلئے 17لاکھ روپے سے زائد وصول کئے، انسانی سمگلر اسد عباس نے متاثرہ شہری کو یونان بھجوانے کیلئے 20لاکھ روپے وصول کئے۔ترجمان ایف آئی اے کا کہنا ہے کہ گرفتار ملزمان بھاری رقوم وصول کر کے روپوش ہوگئے تھے، دیگر ملزمان کی گرفتاری کے لئے چھاپے مارے جا رہے ہیں۔