ہنٹر بائیڈن کو معافی مل گئی، ہش منی کیس بھی ختم کیا جائے، ٹرمپ

ٹرمپ کے وکیل نے زبان بندی کے لیے رقم دینے کے کیس کو خارج کرنے کی درخواست بھی دائر کر دی
نیویارک(ڈیلی پاکستان آن لائن) امریکا کے نو منتخب صدر ڈونلڈ ٹرمپ نے عدالت سے درخواست کی ہے کہ جو بائیڈن کے بیٹے ہنٹر بائیڈن کو معافی مل گئی ہے، اس لیے ان کے خلاف بھی ہش منی کیس ختم کر دیا جائے۔میڈیارپورٹس کے مطابق صدر ڈونلڈ ٹرمپ کے وکلا نے پیر کو ایک جج سے باضابطہ طور پر درخواست کی ہے کہ وہ ہش منی مجرمانہ سزا کو ختم کر دیں، انھوں نے دلیل دی کہ مقدمہ جاری رکھنے سے صدارتی امور کی انجام دہی میں رکاوٹیں آئیں گی۔انھوں نے صدر جو بائیڈن کی جانب سے اپنے بیٹے ہنٹر بائیڈن کو دی گئی معافی کا بھی حوالہ دیا، جنھیں ٹیکس اور اسلحہ رکھنے کے الزامات میں سزا سنائی گئی تھی۔ ڈونلڈ ٹرمپ نے عدالت سے استدعا کی کہ انھوں نے الیکشن جیت لیا ہے تو ہش منی کیس خارج کیا جائے، اور فوجداری مقدمے میں انھیں قصوروار نہ ٹھہرایا جائے۔ڈونلڈ ٹرمپ کے وکیل نے نیویارک کی عدالت میں زبان بندی کے لیے رقم دینے کے کیس کو خارج کرنے کی درخواست بھی دائر کر دی، یہ درخواست 9 دسمبر کو سنی جائے گی۔ یاد رہے کہ نومنتخب صدر کو اداکارہ اسٹورمی ڈینیئل کو رقم دینے سمیت مالی لین دین سے متعلق 34 الزامات کا سامنا ہے، جسے ہش منی کیس کہا جاتا ہے، اس کیس میں ٹرمپ پر فرد جرم عائد کی جا چکی ہے۔