گنے کا کاشتکار صحیح قیمت نہ ملنے، ملوں کی ظالمانی کٹوتی کے خلاف سراپا احتجاج ہے’ مسرت چیمہ

گندم کے بعد گنے کے کاشتکار کو بھی ذلیل و رسوا کیا جارہا ہے ‘ سینئر رہنما پاکستان تحریک انصاف
لاہور( ڈیلی پاکسان آن لائن)پاکستان تحریک انصاف کی سینئر رہنما مسرت جمشید چیمہ نے کہا ہے کہ جعلی حکمران معیشت کیلئے ریڑھ کی ہڈی کی حیثیت رکھنے والی زراعت کو اپنے ہاتھوں سے تباہ کر رہے ہیں، پہلے گندم کی فصل لگانے والے کسان کو ذلیل و رسوا کیا گیا اب یہی حال گنے کے کاشتکاروں کے ساتھ کیا جارہا ہے ، کسان حکومتی پالیسیوں سے متنفر ہو کر جس نہج پر پہنچ چکا ہے اس سے آنے والے سالوںمیں فوڈ سکیورٹی کے خدشات پیدا ہونا شروع ہو گئے ہیں۔ اپنے رد عمل میں مسرت جمشید چیمہ نے کہا کہ پی ٹی آئی کے دور حکومت میں کسانوں کو 2500ارب روپے اضافی آمدن ہوئی تھی جس کی وجہ سے کسان خوشحال ہوا اور معیشت نے بھی ترقی کی ۔ صنعتوں کی ترقی زراعت کی ترقی سے جڑی ہوئی ہے لیکن وژن سے عاری حکمران اسے جان بوجھ کر نظر انداز کر رہے ہیں ۔ زراعت کی ترقی کے صرف دعوے کئے جارہے ہیں جبکہ زمینی حقائق اس کے برعکس ہیں، آج گنے کا کسان اپنی فصل کی صحیح قیمت نہ ملنے اور ملوں کی جانب سے ظالمانہ کٹوتی کے خلاف سراپا احتجاج ہیں لیکن ا س کی کہیں شنوائی نہیں ہو رہی ۔ انہوں نے کہا کہ عمران خان نے ہائی رائز عمارتوں کے حوالے سے منصوبہ بنایا تاکہ قوم کیلئے خوراک دینے والی زرعی اراضی کو بچایا جا سکے لیکن اس منصوبے کوئی پیشرفت نہیں کی گئی ۔